எனர்ஜிடிக் ஸ்டார் ராம் பொதினேனியின் 23வது திரைப்படமான #RAPO23, பல்வேறு காரணங்களால் ஏற்கனவே ரசிகர்களின் கவனத்தை ஈர்த்திருந்த நிலையில், தற்போது இசையமைப்பாளர் சாம் சி.எஸ் இப்படத்தில் இணைந்திருப்பது படத்தின் மீதான எதிர்பார்ப்பை மேலும் உயர்த்தியுள்ளது. இயக்குநராக ராம் பொதினேனி அறிமுகமாகும் இந்த திரைப்படத்திற்கு சாம் சி.எஸ் இசையமைப்பது, தென்னிந்திய திரையுலகில் அதிகம் பேசப்படும் புதிய கூட்டணிகளில் ஒன்றாக மாறியுள்ளது.
சைக்கலாஜிக்கல் ஆக்ஷன் திரில்லர் ஜானரில் உருவாகி வரும் இந்தப் படத்தில், கதையின் பதற்றம், மர்மம் மற்றும் உணர்வுகளை இசையின் மூலம் வலுப்படுத்தும் முக்கிய பொறுப்பை சாம் சி.எஸ் ஏற்றுள்ளார். திரில்லர், ஆக்ஷன், ஹாரர் மற்றும் சஸ்பென்ஸ் திரைப்படங்களுக்கு தனித்துவமான பின்னணி இசையை வழங்கி ரசிகர்களின் பாராட்டைப் பெற்றுள்ள அவர், இந்தப் படத்திலும் புதுமையான இசை அனுபவத்தை வழங்குவார் என்ற நம்பிக்கை படக்குழுவினரிடமும் ரசிகர்களிடமும் உருவாகியுள்ளது.
கடந்த சில ஆண்டுகளில் பின்னணி இசைக்காக தனி அடையாளம் பெற்ற இசையமைப்பாளர்களில் ஒருவராக சாம் சி.எஸ் திகழ்கிறார். கதையின் உணர்வுகளை இசை வழியாக ஆழமாக பார்வையாளர்களிடம் கொண்டு சேர்க்கும் அவரது திறமை, பல வெற்றித் திரைப்படங்களின் முக்கிய பலமாக அமைந்துள்ளது. குறிப்பாக சஸ்பென்ஸ் மற்றும் திரில்லர் படங்களில் அவரது பின்னணி இசையும் சவுண்ட் டிசைனும் ரசிகர்களுக்கு வித்தியாசமான அனுபவத்தை அளித்து வருகிறது.
அதே சமயம், சமீபத்தில் வெளியான ‘இம்மார்டல்’ திரைப்படத்தின் ‘லவ் யூ லவ் யூ காட்டேரி’ பாடல் மூலம், மெலடி இசையிலும் தனது திறமையை மீண்டும் நிரூபித்துள்ளார். காதல் பாடல்களில் மென்மையான இசையையும், திரில்லர் படங்களில் பதற்றத்தை அதிகரிக்கும் பின்னணி இசையையும் சம அளவில் கையாளும் திறமையால் சாம் சி.எஸ் தொடர்ந்து தனது தனி முத்திரையை பதித்து வருகிறார்.
தற்போது தமிழ், தெலுங்கு, கன்னடம் மற்றும் இந்தி உள்ளிட்ட பல மொழிகளில் பிஸியாக இயங்கி வரும் சாம் சி.எஸ், தமிழில் ‘கராத்தே பாபு’, ‘சர்தார் 2’, புஷ்கர்–காயத்ரி இயக்கும் புதிய திரைப்படம், ஹெச். வினோத் – தனுஷ் கூட்டணி படம், ‘டிமான்டி காலனி 3’ உள்ளிட்ட பல முக்கிய படங்களுக்கும் இசையமைத்து வருகிறார். இந்த வரிசையில் ராம் பொதினேனியின் முதல் இயக்குநர் படமும் இணைந்திருப்பது, அவரது பணிப்பட்டியலில் மேலும் ஒரு முக்கிய படைப்பாக அமைந்துள்ளது.
இயக்குநராக புதிய இன்னிங்ஸை தொடங்கும் ராம் பொதினேனியும், தனது இசையால் கதைக்கு உயிரூட்டும் சாம் சி.எஸும் இணைந்துள்ள இந்த கூட்டணி, #RAPO23 திரைப்படத்தின் மீதான எதிர்பார்ப்பை மேலும் பலப்படுத்தியுள்ளது. கதை மட்டுமல்ல, இசையும் இப்படத்தின் முக்கிய பலமாக இருக்கும் என்ற நம்பிக்கையில் ரசிகர்கள் ஆவலுடன் காத்திருக்கின்றனர்.
