தென்னிந்திய திரையுலகில் வெளியாகும் சிறந்த படைப்புகள் மற்றும் கலைஞர்களின் பங்களிப்பை கௌரவிக்கும் முக்கியமான விருது விழாக்களில் ஒன்றாக சைமா (SIIMA) விருதுகள் ஆண்டுதோறும் நடைபெற்று வருகின்றன. அந்த வகையில், இந்த ஆண்டுக்கான சைமா விருது விழாவில் ‘பைசன் காளமாடன்’ திரைப்படத்தில் நடித்ததற்காக நடிகர் துருவ் விக்ரம் சிறந்த நடிகருக்கான விருதை வென்றுள்ளார்.
இளம் தலைமுறை நடிகர்களில் தொடர்ந்து வித்தியாசமான கதாபாத்திரங்களை தேர்வு செய்து வரும் துருவ் விக்ரம், ஒவ்வொரு படத்திலும் தனது நடிப்பின் மூலம் புதிய பரிமாணத்தை வெளிப்படுத்தி வருகிறார். அந்த வரிசையில், அவரது மூன்றாவது திரைப்படத்திலேயே சைமா போன்ற முக்கியமான விருது விழாவில் சிறந்த நடிகர் என்ற அங்கீகாரம் கிடைத்திருப்பது அவரது திரைப்பயணத்தில் குறிப்பிடத்தக்க தருணமாக அமைந்துள்ளது.
மாரி செல்வராஜ் இயக்கத்தில் உருவான ‘பைசன் காளமாடன்’ திரைப்படத்தில், விளையாட்டுத் துறையில் பல்வேறு சவால்களை எதிர்கொள்ளும் இளைஞனாக துருவ் விக்ரம் நடித்திருந்தார். கதாபாத்திரத்தின் தன்மைக்கு ஏற்ப தனது உடல் தோற்றம், உடல்மொழி மற்றும் நடிப்பில் அவர் மேற்கொண்ட மாற்றங்கள் படத்தின் மீது கூடுதல் கவனத்தை ஏற்படுத்தின.
கதாபாத்திரத்தின் மனநிலை, உணர்வுகள் மற்றும் அவன் கடந்து செல்லும் போராட்டங்களை இயல்பாக திரையில் பிரதிபலித்த துருவ் விக்ரமின் நடிப்பு, ‘பைசன் காளமாடன்’ படத்தின் முக்கிய பலங்களில் ஒன்றாக அமைந்தது. குறிப்பாக கதாபாத்திரத்திற்காக அவர் மேற்கொண்ட உடல் மற்றும் நடிப்பு சார்ந்த தயாரிப்புகள் ரசிகர்கள் மத்தியில் கவனம் பெற்றன.
திரைப்பயணத்தின் தொடக்க கட்டத்திலேயே சிறந்த நடிகர் என்ற விருதை பெற்றிருப்பது துருவ் விக்ரமுக்கு கிடைத்துள்ள முக்கியமான அங்கீகாரமாக பார்க்கப்படுகிறது. அழுத்தமான கதாபாத்திரத்தை ஏற்று, அதற்கேற்ப தன்னை மாற்றிக்கொண்டு நடித்ததற்கான பாராட்டாக இந்த விருது அமைந்துள்ளது.
அப்ளாஸ் என்டர்டெயின்மென்ட் சார்பில் சமீர் நாயர், தீபக் சேகல், அதிதி ஆனந்த் மற்றும் நீலம் ஸ்டுடியோஸ் சார்பில் பா. ரஞ்சித் ஆகியோர் இணைந்து தயாரித்த ‘பைசன் காளமாடன்’ திரைப்படத்தில் அனுபமா பரமேஸ்வரன், ஆமீர், லால், பசுபதி, ரஜிஷா விஜயன் உள்ளிட்ட பலர் முக்கிய கதாபாத்திரங்களில் நடித்துள்ளனர்.
வித்தியாசமான களத்தில் உருவான இப்படத்தில் துருவ் விக்ரம் வெளிப்படுத்திய நடிப்பு, அவரது நடிப்புத் திறனை மேலும் வெளிச்சத்திற்கு கொண்டு வந்துள்ளது. சைமா விருது கிடைத்திருப்பது அவரது ரசிகர்களிடையேயும் படக்குழுவினரிடையேயும் உற்சாகத்தை ஏற்படுத்தியுள்ளது.
இதனையடுத்து துருவ் விக்ரம் நடிப்பில் உருவாகி வரும் ‘ஜாக்கி – நோ ரீடேக்ஸ் அலவுட்’ திரைப்படத்தின் மீதும் எதிர்பார்ப்பு அதிகரித்துள்ளது. Mythri Movie Makers தயாரிப்பில் உருவாகும் இப்படத்தை கரண் அரவிந்த் குமார் இயக்குகிறார். ஆக்ஷன் பின்னணியில் உருவாகும் இப்படத்தில் துருவ் விக்ரம் எவ்வாறு புதிய கதாபாத்திரத்தை கையாளப் போகிறார் என்பதை காண ரசிகர்கள் ஆவலுடன் காத்திருக்கின்றனர்.
