முகேன் ராவ் நடிக்கும் “மைலோ” – வித்தியாசமான கதைக்களத்துடன் ஃபர்ஸ்ட் லுக் வெளியீடு!

செல்ல நாயை மையமாகக் கொண்டு மர்மம் கலந்த கதைக்களத்தில் உருவாகியுள்ள ‘மைலோ’ திரைப்படத்தின் தலைப்பும் முதல் பார்வை போஸ்டரும் வெளியாகி ரசிகர்களின் கவனத்தை ஈர்த்துள்ளன. SSR Entertainment சார்பில் K.I. சுரேஷ் தயாரித்துள்ள இப்படத்தில் முகேன் ராவ் கதாநாயகனாக நடித்துள்ளார். கவின் மூர்த்தி இப்படத்தை எழுதி இயக்கியுள்ளார்.

வெளியாகியுள்ள ஃபர்ஸ்ட் லுக் போஸ்டரில், அடர் நீல நிற லெதர் ஜாக்கெட் அணிந்த முகேன் ராவ் கம்பீரமாக நிற்க, அவருக்கு அருகில் தங்க நிறத்திலான செல்ல நாய் இடம்பெற்றுள்ளது. மலைப்பகுதியையும் இயற்கைச் சூழலையும் பின்னணியாகக் கொண்ட இந்தப் போஸ்டரில், ‘MORE THAN A PET, A SILENT WITNESS’ என்ற வாசகம் இடம்பெற்றுள்ளது. இது படத்தின் மர்மம் நிறைந்த கதைக்களம் குறித்த ஆர்வத்தை மேலும் அதிகரித்துள்ளது.

18 ஆண்டுகளுக்கு முன்பு நடைபெற்ற ஒரு குற்றத்தையும், ‘மைலோ’ என்ற செல்ல நாயையும் மையமாகக் கொண்டு இப்படத்தின் திரைக்கதை அமைக்கப்பட்டுள்ளது. பல ஆண்டுகளுக்கு முன்பு நடந்த குற்றத்தின் பின்னணியில் மறைந்திருக்கும் உண்மைகளைக் கதாநாயகன், அந்தச் செல்ல நாயின் துணையுடன் எவ்வாறு கண்டறிகிறார் என்பதே படத்தின் பிரதான அம்சமாகும். மர்மம், உணர்வுகள் மற்றும் கமர்ஷியல் அம்சங்கள் இணைந்த படைப்பாக அனைத்து தரப்பு ரசிகர்களையும் கவரும் வகையில் இப்படம் உருவாகியுள்ளது.

முகேன் ராவுடன் தேஜு அஸ்வினி, இளவரசு, முனீஷ்காந்த், பிக் பாஸ் நிகழ்ச்சி மூலம் பிரபலமான ஜனனி, ‘எங்கள் அண்ணா’ படத்தின் மூலம் கவனம் பெற்ற இந்திரஜா ஆகியோர் நடித்துள்ளனர். மேலும், சுமார் 20 ஆண்டுகளுக்குப் பிறகு தமிழ் சினிமாவில் மீண்டும் நடிக்கும் சுரேஷ் மேனன் மற்றும் ஆதித்யா கதிர் உள்ளிட்டோர் முக்கிய கதாபாத்திரங்களில் நடித்துள்ளனர்.

சென்னை, ஊட்டி, கொல்லிமலை, மூணாறு, திருவனந்தபுரம் மற்றும் மலேசியா உள்ளிட்ட பல்வேறு இடங்களில் படத்தின் படப்பிடிப்பு முழுமையாக நிறைவடைந்துள்ளது.

இப்படத்திற்கு ஜென் மார்ட்டின் இசையமைத்துள்ளார். ஜிஜு சன்னி ஒளிப்பதிவு செய்துள்ளார். வெங்கட் ராஜன் படத்தொகுப்புப் பணிகளை மேற்கொண்டுள்ளார். உமா சங்கர் மற்றும் ஜெயமுருகன் கலை இயக்கத்தைக் கவனித்துள்ளனர். கவின் மூர்த்தி மற்றும் சந்திரன் வசனங்களை எழுதியுள்ளனர். ஏ. ராஜா இணை இயக்குநராகப் பணியாற்றியுள்ளார். மணி சந்திரா மற்றும் விஜி நடன அமைப்பையும், ஃபீனிக்ஸ் பிரபு மற்றும் மிராக்கிள் மைக்கேல் சண்டைப் பயிற்சியையும் மேற்கொண்டுள்ளனர்.

‘மைலோ’ திரைப்படத்தின் இசை வெளியீட்டு விழா மற்றும் திரையரங்க வெளியீட்டுத் தேதி குறித்த அறிவிப்புகள் விரைவில் வெளியாகும் என எதிர்பார்க்கப்படுகிறது. 18 ஆண்டுகளுக்கு முந்தைய குற்றத்தின் மர்மத்தை ஒரு செல்ல நாயின் துணையுடன் நாயகன் அவிழ்க்கும் வித்தியாசமான கதைக்களம், படத்தின் முதல் பார்வை போஸ்டருடன் இணைந்து ரசிகர்களிடையே எதிர்பார்ப்பை ஏற்படுத்தியுள்ளது.