தமிழ் சினிமாவில் தரமான படைப்புகளின் அடையாளமாக விளங்கி வரும் சத்யஜோதி பிலிம்ஸ், 72-வது தேசிய திரைப்பட விருதுகள் மூலம் தனது நீண்டகால திரைப்பயணத்தில் மேலும் ஒரு பெருமைமிகு சாதனையை பதிவு செய்துள்ளது. அந்நிறுவனம் தயாரித்த ‘கேப்டன் மில்லர்’ திரைப்படம், தேசிய, சமூக மற்றும் சுற்றுச்சூழல் மதிப்புகளை முன்னிறுத்தும் சிறந்த திரைப்படம் என்ற தேசிய விருதை வென்றுள்ளது. மேலும், இப்படத்தில் சிறப்பான நடிப்பை வெளிப்படுத்திய நடிகர் தனுஷ், Special Mention தேசிய அங்கீகாரத்தைப் பெற்றுள்ளார்.
இந்த வெற்றி, ஒரு திரைப்படத்திற்குக் கிடைத்த அங்கீகாரத்தைத் தாண்டி, ஏழு தசாப்தங்களாக தரமான, சமூக அக்கறை மிக்க திரைப்படங்களை வழங்கி வரும் சத்யஜோதி பிலிம்ஸின் பாரம்பரியத்திற்குக் கிடைத்த மரியாதையாகக் கருதப்படுகிறது.
இந்த வெற்றிப் பயணத்தின் அடித்தளம், 1959-ஆம் ஆண்டு வீனஸ் டி. கோவிந்தராஜன் தயாரித்த ‘கல்யாண பரிசு’ திரைப்படத்தின் மூலம் அமைந்தது. அப்படம் தமிழில் சிறந்த திரைப்படத்திற்கான தேசிய விருதைப் பெற்று, இந்த தயாரிப்பு குடும்பத்தின் தேசிய விருது வரலாற்றை தொடங்கிவைத்தது.
அதனைத் தொடர்ந்து ஆர். எம். வீரப்பன் தயாரித்த ‘ரிக்ஷாக்காரன்’ திரைப்படத்தின் மூலம், மக்கள் திலகம் எம்.ஜி. ராமச்சந்திரன், சிறந்த நடிகருக்கான தேசிய விருதைப் பெற்று வரலாறு படைத்தார்.
பின்னர் டி.ஜி. தியாகராஜன் தலைமையில் சத்யஜோதி பிலிம்ஸ் புதிய உயரங்களை எட்டியது. அவர் தயாரித்த ‘மூன்றாம் பிறை’ திரைப்படம் மூன்று தேசிய விருதுகளை வென்றதோடு, நடிகர் கமல்ஹாசனுக்கு முதல் தேசிய விருதையும் பெற்றுத் தந்தது. இதன் மூலம் தரமான திரைப்படங்களை உருவாக்கும் நிறுவனமாக சத்யஜோதி பிலிம்ஸ் தனது இடத்தை உறுதிப்படுத்தியது.
தற்போது மூன்றாம் தலைமுறையாக செந்தில் தியாகராஜன் மற்றும் அர்ஜுன் தியாகராஜன், அதே அர்ப்பணிப்புடனும் தொலைநோக்கு பார்வையுடனும் நிறுவனத்தின் பயணத்தை முன்னெடுத்து வருகின்றனர். அவர்களின் தயாரிப்புகள் தொடர்ந்து ரசிகர்களின் வரவேற்பையும் விமர்சகர்களின் பாராட்டுகளையும் பெற்று வருகின்றன.
இதற்கு முன்பு ‘விஸ்வாசம்’ திரைப்படம் தேசிய அளவில் சிறந்த இசைக்கான விருதைப் பெற்றிருந்தது. அதனைத் தொடர்ந்து சர்வதேச அளவிலும் கவனம் பெற்ற ‘கேப்டன் மில்லர்’, 2024-ஆம் ஆண்டு UK National Film Awards-ல் பாராட்டுகளைப் பெற்றதுடன், தற்போது இரண்டு தேசிய விருதுகளை வென்று சத்யஜோதி பிலிம்ஸின் சாதனைப் பட்டியலில் புதிய அத்தியாயத்தை எழுதியுள்ளது.
இந்த வெற்றிக்கு காரணமான இயக்குநர் அருண் மாதேஸ்வரன், நடிகர் தனுஷ், நடிகர், நடிகைகள், தொழில்நுட்பக் கலைஞர்கள் மற்றும் ‘கேப்டன் மில்லர்’ படக்குழுவினருக்கு சத்யஜோதி பிலிம்ஸ் தனது நன்றியைத் தெரிவித்துள்ளது. குறிப்பாக தேசிய அளவில் Special Mention விருதைப் பெற்ற தனுஷுக்கு மனமார்ந்த வாழ்த்துகளையும் நிறுவனம் தெரிவித்துள்ளது.
ஏழு தசாப்தங்களாக மக்களை மகிழ்விப்பதோடு மட்டுமல்லாமல், சிந்திக்க வைக்கும் மற்றும் சமூகத்தில் தாக்கத்தை ஏற்படுத்தும் திரைப்படங்களை உருவாக்க வேண்டும் என்ற நோக்கத்துடன் பயணித்து வரும் சத்யஜோதி பிலிம்ஸுக்கு, ‘கேப்டன் மில்லர்’ பெற்றுள்ள இந்த தேசிய அங்கீகாரம், அதன் தரமான கதை சொல்லும் மரபின் தொடர்ச்சியை மீண்டும் ஒருமுறை உறுதிப்படுத்தியுள்ளது.
இந்த இரண்டு தேசிய விருதுகள், நிறுவனத்தின் கடந்தகால சாதனைகளை கொண்டாடுவதோடு மட்டுமல்லாமல், எதிர்காலத்தில் இந்திய சினிமாவுக்கு மேலும் பல தரமான மற்றும் அர்த்தமுள்ள படைப்புகளை வழங்கும் புதிய உத்வேகமாகவும் அமைந்துள்ளன.
