ஃபேன்டஸி ஆக்ஷனில் கலக்கும் துல்கர் சல்மான்… “ஐ ஆம் கேம்” டிரெய்லர் வெளியானது!

மலையாள சினிமாவின் இந்த ஆண்டின் மிகப்பெரிய எதிர்பார்ப்புக்குரிய திரைப்படங்களில் ஒன்றாக உருவாகியுள்ள ‘ஐ ஆம் கேம்’ (I Am Game) படத்தின் அதிரடி டிரெய்லர் அதிகாரப்பூர்வமாக வெளியாகியுள்ளது. ரசிகர்கள் நீண்ட நாட்களாக ஆவலுடன் காத்திருந்த இந்த திரைப்படம், ஓணம் பண்டிகையை முன்னிட்டு வரும் ஆகஸ்ட் 20, 2026 அன்று உலகம் முழுவதும் திரையரங்குகளில் வெளியாகிறது.

நடிகர் துல்கர் சல்மானின் Wayfarer Films நிறுவனம் தயாரித்துள்ள இந்த மெகா பட்ஜெட் ஃபேன்டஸி ஆக்ஷன் திரில்லர், அவரது திரைப்பயணத்தில் இதுவரை இல்லாத அளவுக்கு பிரம்மாண்டமாக உருவாகியுள்ளது. இயக்குநர் நஹாஸ் ஹிதாயத் இயக்கியுள்ள இப்படத்தை துல்கர் சல்மானும் ஜோம் வர்கீஸும் இணைந்து தயாரித்துள்ளனர்.

திரைக்கதையை சஜிர் பாபா, இஸ்மாயில் அபூபக்கர் மற்றும் பிலால் மொய்து இணைந்து உருவாக்கியுள்ள நிலையில், வசனங்களை சஜிர் பாபா, ஆதர்ஷ் சுகுமாரன் மற்றும் ஷபாஸ் ரஷீத் எழுதியுள்ளனர்.

வெளியான டிரெய்லர், தொடக்கம் முதல் இறுதிவரை பரபரப்பை தக்கவைத்திருக்கும் வகையில் வடிவமைக்கப்பட்டுள்ளது. பிரம்மாண்டமான காட்சியமைப்புகள், ஸ்டைலிஷ் ஆக்ஷன், அதிவேக சேஸ் காட்சிகள் மற்றும் ஹாலிவுட் தரத்தை நினைவூட்டும் தொழில்நுட்பம் ஆகியவை படத்தின் மீதான எதிர்பார்ப்பை மேலும் உயர்த்தியுள்ளன. குறிப்பாக, இதுவரை இல்லாத மாஸ் மற்றும் ஸ்டைலிஷ் தோற்றத்தில் துல்கர் சல்மான் ரசிகர்களை கவரும் விதமாக காட்சியளிக்கிறார்.

தென்னிந்தியாவின் 100-க்கும் மேற்பட்ட இடங்களில் படமாக்கப்பட்டுள்ள இப்படம், மலையாள சினிமாவின் மிகப்பெரிய பான்-இந்தியா வெளியீடுகளில் ஒன்றாக உருவாகியுள்ளது. முன்னதாக வெளியான ஃபர்ஸ்ட் லுக் மற்றும் செகண்ட் லுக் போஸ்டர்களும் சமூக வலைதளங்களில் பெரும் வரவேற்பைப் பெற்றிருந்தன.

இப்படத்தின் இசை உரிமையை ஜீ மியூசிக் கைப்பற்றியுள்ளது. இசையமைப்பாளர் ஜேக்ஸ் பிஜாய் வழங்கியுள்ள பின்னணி இசை டிரெய்லரின் முக்கிய பலமாக அமைந்துள்ளது. ஒளிப்பதிவாளர் ஜிம்ஷி காலித் வழங்கியுள்ள காட்சியமைப்புகளும் ரசிகர்களின் பாராட்டைப் பெற்று வருகின்றன. அதிரடி சண்டைக் காட்சிகளை அன்பறிவ் மாஸ்டர்கள் வடிவமைத்துள்ளனர்.

‘லோகா’ திரைப்படத்தின் வெற்றிக்குப் பிறகு Wayfarer Films தயாரிக்கும் அடுத்த பிரம்மாண்ட படைப்பாக உருவாகியுள்ள ‘ஐ ஆம் கேம்’, துல்கர் சல்மானின் 40-வது திரைப்படம் என்ற சிறப்பையும் பெற்றுள்ளது.

துல்கர் சல்மானுடன் ஆண்டனி வர்கீஸ், மிஷ்கின், கயாது லோஹர், கதிர், பார்த் திவாரி, சம்யுக்தா விஸ்வநாதன் உள்ளிட்ட பலர் முக்கிய கதாபாத்திரங்களில் நடித்துள்ளனர்.

‘RDX’ திரைப்படத்தின் வெற்றிக்குப் பிறகு இயக்குநர் நஹாஸ் ஹிதாயத் இயக்கியுள்ள இந்த திரைப்படம், மலையாளம், தமிழ், தெலுங்கு, இந்தி மற்றும் கன்னடம் ஆகிய ஐந்து மொழிகளில் பான்-இந்தியா வெளியீடாக ஆகஸ்ட் 20 அன்று உலகம் முழுவதும் திரையரங்குகளில் வெளியாகவுள்ளது.