தமிழ் சினிமாவின் மிக வெற்றிகரமான திகில் திரைப்பட வரிசைகளில் ஒன்றான ‘டிமான்டி காலனி’ தனது மூன்றாவது பாகத்துடன் மீண்டும் ரசிகர்களை அச்சுறுத்த வர தயாராகியுள்ளது. சுமார் 11 ஆண்டுகளாக ரசிகர்களிடையே தனி இடத்தை பிடித்துள்ள இந்த பிரபல ஹாரர் ஃபிரான்சைஸின் புதிய அத்தியாயமான ‘டிமான்டி காலனி 3 – தி எண்ட் இஸ் டூ ஃபார்’ திரைப்படம் வரும் செப்டம்பர் 11 ஆம் தேதி உலகம் முழுவதும் திரையரங்குகளில் வெளியாகிறது.
உலகளவில் ‘தி கான்ஜூரிங்’, ‘ஈவில் டெட்’ போன்ற திகில் தொடர் படங்களுக்கு கிடைக்கும் வரவேற்பைப் போலவே, தமிழில் ‘டிமான்டி காலனி’ திரைப்படமும் ரசிகர்களின் பேராதரவை பெற்றுள்ளது. முதல் பாகத்தின் வெற்றியைத் தொடர்ந்து வெளியான இரண்டாம் பாகமும் பெரும் வரவேற்பைப் பெற்ற நிலையில், தற்போது மூன்றாம் பாகம் குறித்த எதிர்பார்ப்பு உச்சத்தை எட்டியுள்ளது.
அருள்நிதி கதாநாயகனாக நடிக்கும் இப்படத்தை அஜய் ஞானமுத்து எழுதி இயக்கியுள்ளார். முந்தைய பாகங்களில் உருவாக்கப்பட்ட மர்ம உலகத்தை மேலும் விரிவுபடுத்தி, புதிய திகில் அனுபவத்தை வழங்கும் வகையில் படம் உருவாகியுள்ளதாக கூறப்படுகிறது.
சுதன் சுந்தரம், மனிஷ் சிங்கால் மற்றும் துர்காராம் சௌத்ரி ஆகியோர் தயாரித்துள்ள இப்படம் குறித்துப் பேசிய தயாரிப்பாளர் சுதன் சுந்தரம், “முதல் இரண்டு பாகங்களையும் இயக்குநர் அஜய் ஞானமுத்து இணைத்த விதம் ரசிகர்களை ஆச்சரியப்படுத்தியது. ‘டிமான்டி காலனி 2’ மூலம் ஒரு சீக்வலும் மிகப்பெரிய வெற்றி பெற முடியும் என்பதை அவர் நிரூபித்தார். தற்போது ‘டிமான்டி காலனி 3’ படத்தின் இறுதி வடிவத்தை பார்த்த பிறகு, இந்தப் பயணத்தின் ஒரு பகுதியாக இருப்பதில் பெருமை கொள்கிறேன். ரசிகர்களுக்காக ஏராளமான ஆச்சரியங்கள் காத்திருக்கின்றன,” என்று தெரிவித்துள்ளார்.
மேலும், அருள்நிதி மற்றும் முழு படக்குழுவும் மிகுந்த அர்ப்பணிப்புடன் படத்தை அடுத்த கட்டத்திற்கு எடுத்துச் சென்றிருப்பதாகவும், விரைவில் படத்தின் பிரம்மாண்டமான புரமோஷன் மற்றும் மார்க்கெட்டிங் பணிகள் தொடங்கவுள்ளதாகவும் அவர் கூறினார்.
ஆர்டிஎக்ஸ் மீடியா, ஞானமுத்து பட்டறை, பேஷன் ஸ்டுடியோஸ் மற்றும் டங்கல் டிவி இணைந்து வழங்கும் இந்த திரைப்படம், திகில் ரசிகர்களுக்கு மறக்க முடியாத திரை அனுபவத்தை வழங்கும் என்ற எதிர்பார்ப்பை ஏற்படுத்தியுள்ளது.
“சில கதைகள் ஒருபோதும் முடிவதில்லை” என்ற வாசகத்துடன் வெளியாகவுள்ள ‘டிமான்டி காலனி 3’, இந்த ஆண்டு திகில் ரசிகர்கள் அதிகம் எதிர்பார்க்கும் திரைப்படங்களில் ஒன்றாக உருவெடுத்துள்ளது.
