‘Cakeu Walku’ பாடலுடன் கவனம் ஈர்க்கும் “Don’t Trouble the Trouble”!

மலையாள திரையுலகின் முன்னணி நடிகர்களில் ஒருவரான ஃபஹத் பாசில், ‘பாகுபலி’ உள்ளிட்ட பிரம்மாண்ட படைப்புகளை உருவாக்கிய அர்கா மீடியா ஒர்க்ஸ் மற்றும் இயக்குநர் எஸ்.எஸ். ராஜமௌலி ஆகியோரின் பின்னணியில் உருவாகும் புதிய திரைப்படம் ‘Don’t Trouble the Trouble’. வித்தியாசமான ஃபேண்டஸி என்டர்டெய்னராக உருவாகி வரும் இப்படம் ரசிகர்கள் மத்தியில் எதிர்பார்ப்பை ஏற்படுத்தியுள்ளது.

ஷோயிங் பிசினஸ் நிறுவனத்தின் சார்பில் ‘பிரேமலு’ திரைப்படத்தின் மூலம் விநியோகத் துறையில் வெற்றியைப் பதிவு செய்த தயாரிப்பாளர் எஸ்.எஸ். கார்த்திகேயா, தற்போது அர்கா மீடியா ஒர்க்ஸுடன் இணைந்து இப்படத்தை உருவாக்கி வருகிறார்.

‘Don’t Trouble the Trouble’ திரைப்படத்தை அறிமுக இயக்குநர் ஷஷாங்க் எலெட்டி இயக்குகிறார். ஃபஹத் பாசில் கதாநாயகனாக நடிக்கும் இப்படத்தை ஷோபு யர்லகட்டா, பிரசாத் தேவினேனி மற்றும் எஸ்.எஸ். கார்த்திகேயா ஆகியோர் இணைந்து தயாரிக்கின்றனர்.

ஏற்கனவே வெளியான டீசர் கவனம் பெற்ற நிலையில், தற்போது படத்தின் ‘கேக்கு வாக்கு’ (Cakeu Walku) என்ற வீடியோ பாடல் வெளியாகியுள்ளது. கால பைரவா இசையமைத்துள்ள இந்தப் பாடல், ஃபஹத் பாசில் ஏற்று நடித்துள்ள சூரி கதாபாத்திரத்தின் வித்தியாசமான குணாதிசயங்களையும், அவரது தனித்துவமான அணுகுமுறையையும் அறிமுகப்படுத்தும் வகையில் அமைந்துள்ளது.

கால பைரவா, ஃபஹத் பாசில் மற்றும் சாரா இடம்பெறும் வகையில் உருவாக்கப்பட்டுள்ள இந்த இசை வீடியோ, தொடக்கத்தில் மென்மையான இசையுடன் பயணித்து, பின்னர் கால பைரவாவின் துள்ளலான இசை மற்றும் நடனத்துடன் உற்சாகமான கொண்டாட்டமாக மாறுகிறது. அவரது இசை மற்றும் நடன அசைவுகள் பாடலுக்கு கூடுதல் வேகத்தையும் வண்ணத்தையும் சேர்த்துள்ளன.

கால பைரவா மற்றும் வாசி இணைந்து பாடலுக்கான வரிகளை எழுதியுள்ளனர். சூரியின் துணிச்சலான குணத்தையும், எத்தகைய சவாலான சூழலாக இருந்தாலும் அதை எளிதாக எதிர்கொள்ளும் அவரது தன்மையையும் பாடல் வரிகள் பிரதிபலிக்கின்றன. பாடலை கால பைரவாவும் வாசியும் இணைந்து உற்சாகமாக பாடியுள்ளனர்.

ஃபஹத் பாசிலும் தனது வழக்கமான நடிப்பைத் தாண்டி, இந்த பாடலில் உற்சாகமான உடல்மொழி மற்றும் வசீகரமான நடன அசைவுகளுடன் ரசிகர்களை கவர்கிறார். அவரது தோற்றமும் நடிப்பும் ‘ஆவேசம்’ படத்தில் அவர் ஏற்றிருந்த ரங்கா கதாபாத்திரத்தை நினைவுபடுத்தும் வகையில் இருப்பதாக ரசிகர்கள் மத்தியில் எதிர்பார்ப்பு உருவாகியுள்ளது. சாராவின் பங்களிப்பும் இசை வீடியோவுக்கு கூடுதல் சிறப்பை சேர்த்துள்ளது.

படத்தின் இசை ஆல்பத்தின் முதல் பாடலே ரசிகர்களிடம் நல்ல வரவேற்பைப் பெற்று, எதிர்பார்ப்பை மேலும் அதிகரித்துள்ளது. வித்தியாசமான கதை, ஃபேண்டஸி அம்சங்கள் மற்றும் நகைச்சுவை கலந்த பொழுதுபோக்குடன் உருவாகி வரும் ‘Don’t Trouble the Trouble’, வரும் செப்டம்பர் 11, 2026 அன்று பிரம்மாண்டமாக திரையரங்குகளில் வெளியாகிறது.