தமிழ் சினிமாவின் திறமையான மற்றும் பன்முகத் திறன் கொண்ட நடிகர்களில் ஒருவரான ரவி மோகன், தனது தனித்துவமான கதாபாத்திரத் தேர்வுகள் மற்றும் வித்தியாசமான திரைப்படங்கள் மூலம் ரசிகர்களின் மனதில் தனி இடத்தைப் பிடித்துள்ளார். நாயகனை மையமாகக் கொண்ட கதைகள் முதல் சவாலான கதாபாத்திரங்கள் வரை பல்வேறு ஜானர்களில் தன்னை நிரூபித்துள்ள அவர், தற்போது மிகவும் எதிர்பார்க்கப்படும் ‘பென்ஸ்’ திரைப்படத்தில் முக்கிய கதாபாத்திரத்தில் இணைந்துள்ளார்.
‘பேராண்மை’ முதல் ‘தனி ஒருவன்’ வரை பல வெற்றிப்படங்களில் தனது திறமையை வெளிப்படுத்தியுள்ள ரவி மோகன், தமிழ் சினிமாவின் மிகவும் நம்பகமான நடிகர்களில் ஒருவராக திகழ்கிறார். அவரது கதாபாத்திரத் தேர்வுகளும், ஒவ்வொரு படத்திற்கும் காட்டும் அர்ப்பணிப்பும் அவருக்கு தனித்துவமான ரசிகர் பட்டாளத்தை உருவாக்கியுள்ளது.
இந்நிலையில், ராகவா லாரன்ஸ் கதாநாயகனாகவும், நிவின் பாலி வில்லனாகவும் நடிக்கும் ‘பென்ஸ்’ திரைப்படத்தில் ரவி மோகன் இணைந்திருப்பது படத்தின் மீதான ரசிகர்களின் எதிர்பார்ப்பை மேலும் உயர்த்தியுள்ளது. LCU-வில் உருவாகி வரும் இந்த திரைப்படம், அறிவிக்கப்பட்ட நாள் முதல் ரசிகர்களிடையே பெரும் கவனத்தை ஈர்த்து வருகிறது.
ரவி மோகன் படத்தில் இணைந்தது குறித்து பேஷன் ஸ்டுடியோஸ் தயாரிப்பாளர் சுதன் சுந்தரம் கூறுகையில், “இன்றைய தமிழ் சினிமாவின் மிகவும் திறமையான மற்றும் பல்துறை திறன் கொண்ட நடிகர்களில் ரவி மோகனும் ஒருவர். வித்தியாசமான திரைப்படங்கள் மற்றும் வணிக ரீதியான பொழுதுபோக்கு படங்கள் என இரண்டிலும் வெற்றிகரமாக பயணித்து வருகிறார். அவரது திரை ஆளுமை, நேர்மை மற்றும் கதாபாத்திரங்களுக்காக செலுத்தும் அர்ப்பணிப்பு ஆகியவை ஒவ்வொரு படத்தையும் தனித்துவமாக மாற்றுகின்றன.
வழக்கத்திற்கு மாறான கதைகளாக இருந்தாலும், வணிக ரீதியான படங்களாக இருந்தாலும் ரசிகர்களை திரையரங்குகளுக்கு ஈர்க்கும் திறன் கொண்ட நடிகர்களில் ரவி மோகனும் ஒருவர். ‘பென்ஸ்’ திரைப்படத்தில் அவர் இணைந்திருப்பது படத்தின் பிரம்மாண்டத்தை மேலும் உயர்த்தியுள்ளது. நிச்சயம் இந்த திரைப்படம் ரசிகர்களுக்கு சிறப்பான அனுபவமாக இருக்கும்” என்றார்.
தமிழ் சினிமாவில் பல முன்னணி நட்சத்திரங்கள் இணைந்து நடித்த ‘பொன்னியின் செல்வன்’, ‘விக்ரம்’ உள்ளிட்ட திரைப்படங்கள் ரசிகர்களிடம் பெரும் வரவேற்பைப் பெற்றுள்ள நிலையில், ராகவா லாரன்ஸ், ரவி மோகன் மற்றும் நிவின் பாலி இணையும் ‘பென்ஸ்’ திரைப்படமும் அந்த வரிசையில் இடம்பெறும் என எதிர்பார்க்கப்படுகிறது.
இயக்குநர் பாக்கியராஜ் கண்ணன் இயக்கத்தில் உருவாகி வரும் ‘பென்ஸ்’ திரைப்படத்தின் படப்பிடிப்பு பணிகள் தற்போது விறுவிறுப்பாக நடைபெற்று வருகின்றன. படம் குறித்த மேலும் பல முக்கிய அறிவிப்புகள் விரைவில் வெளியாகும் என படக்குழு தெரிவித்துள்ளது.
