"விஸ்வநாத் & சன்ஸ்" திரை விமர்சனம்

“விஸ்வநாத் & சன்ஸ்” வெங்கி அட்லூரி இயக்கத்தில் சூர்யதேவார நாக வம்சி, சாய் செளஜன்யா, மற்றும் யலமஞ்சிலி கோபால கிருஷ்ணா தயாரிப்பில் உருவாகியிருக்கும் இந்த படத்திற்கு இசை ஜி.வி. பிரகாஷ். இந்த படத்தில் சூர்யா, மமிதா பைஜு, ராதிகா சரத்குமார், ரவீனா டாண்டன், சுனில் ரெட்டி மற்றும் பலர் நடித்துள்ளனர்.

பெரும் தொழிலதிபராகவும், துப்பாக்கிச் சுடுதலில் ஒலிம்பிக் தங்கப்பதக்கம் வென்றவராகவும் இருக்கும் சூர்யா தன் தாய் ராதிகாவுடன் வாழ்ந்து வருகிறார். 40 வயதைக் கடந்தும், சிறுவயதில் நடந்த ஒரு சோகமான சம்பவத்தால் சூர்யா திருமணம் செய்ய மறுக்கிறார். இந்தச் சூழலில், துடிப்பான 20 வயது இளம்பெண்ணான மமிதா பைஜூ அவரது வாழ்க்கைக்குள் வருகிறார். இவர்களுக்கிடையேயான வயது வித்தியாசம், காதல் மற்றும் குடும்ப உறவுகளுக்குள் ஏற்படும் உணர்வுப் போராட்டங்களைச் சுற்றியே “விஸ்வநாத் & சன்ஸ்” படத்தின் கதை நகர்கிறது.

சூர்யாவின் நடிப்பு நன்றாக இருந்தாலும், அவரது நட்சத்திர அந்தஸ்துக்கு ஏற்ற மாஸ் தருணங்கள் படத்தில் குறைவு. கதாபாத்திரத்தின் மென்மையான அணுகுமுறை படத்திற்கு பொருத்தமாக இருந்தாலும், சூர்யாவிடம் இருந்து வழக்கமாக எதிர்பார்க்கும் அழுத்தமான நடிப்புத் தருணங்கள் குறைவாக இருப்பது ரசிகர்களுக்கு ஏமாற்றமாக இருக்கலாம்.

மமிதா பைஜுவின் நடிப்பு படத்தின் முக்கியமான பிளஸ். அவரது கதாபாத்திரம் இளமைத் துடிப்புடனும் இயல்பான நகைச்சுவை உணர்வுடனும் அமைந்திருக்கிறது. சூர்யாவுடன் அவரது கெமிஸ்ட்ரியும் பல இடங்களில் ரசிக்க வைக்கிறது. மமிதா படத்தையே தாங்கிச் செல்கிறார் என்றும் பாராட்டும்படியாக அவரது நடிப்பு உள்ளது.

அம்மா கதாபாத்திரத்தில் நடித்துள்ள ராதிகா சரத்குமார், ரவீனா டாண்டன், சுனில் ரெட்டி உள்ளிட்டோர் தங்களுக்கு வழங்கப்பட்ட கதாபாத்திரங்களுக்கு சிறப்பான பங்களிப்பை வழங்கியுள்ளனர். குறிப்பாக, ராதிகா சரத்குமார் – மமிதா பைஜு இடையேயான காம்பினேஷன் இயல்பான நடிப்பாலும், அழகான கெமிஸ்ட்ரியாலும் ரசிக்க வைக்கிறது.

ஜி.வி. பிரகாஷ் குமாரின் பின்னணி இசையும், பாடல்களும் படத்தின் உணர்வுப்பூர்வமான காட்சிகளுக்கு கூடுதல் வலு சேர்த்து படத்தையே தங்கிச்செல்கிறது என்று சொல்லும்படியாக பிரமாதமாக அமைந்துள்ளது. குறிப்பாக முக்கியமான தருணங்களில் அவரது இசை காட்சிகளின் தாக்கத்தை அதிகரிக்கிறது.

நிமிஷ் ரவியின் ஒளிப்பதிவு படத்திற்கு அழகான காட்சித் தோற்றத்தை வழங்குகிறது. அமெரிக்கா உள்ளிட்ட வெளிநாட்டு பகுதிகளில் படமாக்கப்பட்ட காட்சிகள் பிரம்மாண்டமாகவும் வண்ணமயமாகவும் இருக்கிறது.

நவீன் நூலியின் படத்தொகுப்பு படத்தின் நீளமான கதைக்களத்தை ஓரளவுக்கு சீராக நகர்த்துகிறது. குடும்ப உணர்வுகள் மற்றும் உறவுகள் சார்ந்த காட்சிகளுக்கு தேவையான இடத்தை வழங்கியிருந்தாலும், சில காட்சிகள் சற்று நீளமாக இருப்பதால் படத்தின் வேகம் ஆங்காங்கே குறைகிறது. குறிப்பாக இரண்டாம் பாதியில் சில காட்சிகளை இன்னும் கச்சிதமாகக் குறைத்திருந்தால், படத்தின் ஓட்டம் மேலும் விறுவிறுப்பாக இருந்திருக்கும்.

வெங்கி அட்லூரியின் இயக்கத்தில் படத்தின் கதை சுவாரஸ்யமாக இருந்தாலும், சில திருப்பங்கள் முன்கூட்டியே கணிக்கக்கூடியதாக இருக்கின்றன. இதனால் இரண்டாம் பாதியில் சஸ்பென்ஸ் குறைந்து, அடுத்து என்ன நடக்கும் என்ற ஆர்வமும் சில இடங்களில் குறைகிறது. மேலும் குடும்பப் பிரச்சினைகள் மற்றும் உணர்ச்சிக் காட்சிகளுக்குள் அதிக நேரம் செலவிடுவதால் சில இடங்களில் இழுபறியாகத் தெரிகிறது.

முதல் பாதி ரசிக்க வைக்கும் நிலையில், இரண்டாம் பாதியில் வரும் சில நீளமான உணர்வுக் காட்சிகள் படத்தின் வேகத்தை குறைக்கின்றன. மேலும், படத்தின் குடும்ப உணர்வுகள் சில இடங்களில் அதிகமாக அழுத்தப்படுவது கதையின் இயல்பான ஓட்டத்தை பாதிக்கிறது. இதனால் பார்வையாளர்களை உணர்ச்சிவசப்படுத்த வேண்டும் என்ற நோக்கத்தில் அமைக்கப்பட்ட சில காட்சிகள் எதிர்பார்த்த தாக்கத்தை ஏற்படுத்தாமல் போகலாம்.

சண்டைக் காட்சிகள் அதிகமாக இடம்பெறவில்லை என்றாலும், கதைக்கு தேவையான இடங்களில் அவை சரியான அளவில் பயன்படுத்தப்பட்டுள்ளன. சில சண்டைக் காட்சிகள் இன்னும் விறுவிறுப்பாகவும் அழுத்தமாகவும் காட்சிப்படுத்தப்பட்டிருந்தால், படத்தின் தாக்கம் மேலும் அதிகரித்திருக்கும்.

படத்தின் சில பகுதிகள் ஏற்கனவே பார்த்த பல குடும்பத் திரைப்படங்களின் சாயலை நினைவூட்டுகின்றன. குறிப்பாக, சில காட்சிகள் தேவைக்கு அதிகமாக நீளமாகவும் மெதுவாகவும் நகர்வதால், திரையரங்க அனுபவத்தில் சற்று தொய்வு ஏற்படுகிறது. இதனால் ஒரு கட்டத்தில் படம் திரைப்படத்தைவிட மெகா சீரியல் பாணியில் நகர்வது போன்ற உணர்வையும் ஏற்படுத்துகிறது.

‘விஸ்வநாத் & சன்ஸ்’ மோசமான திரைப்படம் அல்ல; ஆனால் அதன் சுவாரஸ்யமான கதைக்கருவை இன்னும் இறுக்கமான திரைக்கதையுடன் சொல்லியிருந்தால் இன்னும் நன்றாக அனைவரையும் கவரும் வண்ணம் இருந்திருக்கும்.