மாஸ் மகாராஜா ரவி தேஜா நடிப்பில் உருவாகியுள்ள பெரும் எதிர்பார்ப்புக்குரிய திரைப்படம் ‘இருமுடி’. சிவா நிர்வாணா இயக்கியுள்ள இப்படத்தை மைத்ரி மூவி மேக்கர்ஸ் நிறுவனம் பிரம்மாண்டமாக தயாரித்துள்ளது. ஏற்கனவே வெளியான படத்தின் க்ளிம்ப்ஸ் மற்றும் பாடல்கள் ரசிகர்களிடம் நல்ல வரவேற்பைப் பெற்ற நிலையில், தற்போது தமிழ் மற்றும் தெலுங்கு மொழிகளில் திரையரங்க டிரெய்லர் வெளியாகியுள்ளது.
வரும் ஆகஸ்ட் 21ஆம் தேதி உலகம் முழுவதும் திரையரங்குகளில் வெளியாகவுள்ள ‘இருமுடி’, குடும்ப உறவுகள், ஆக்ஷன், மர்மம் மற்றும் த்ரில்லர் ஆகிய அம்சங்களை ஒருங்கிணைத்த திரைப்படமாக உருவாகியுள்ளது.
டிரெய்லரில் ரவி தேஜா, நடுத்தரக் குடும்பத்தைச் சேர்ந்த பொறுப்பான குடும்பத் தலைவராக காட்சியளிக்கிறார். மனைவி மற்றும் மகள் மீது அளவற்ற அன்பு கொண்டிருக்கும் அவர், தனது கிராமத்தில் வசிக்கும் பெண்களையும் தன் மகள்களைப் போலவே கருதி பாதுகாக்கிறார். அவர்களுக்கு எதிராக எந்தவித அநீதியும் நடந்தாலும் அதை எதிர்த்து போராடத் தயங்காத ஆக்ரோஷமான மனிதராகவும் அவரது கதாபாத்திரம் வடிவமைக்கப்பட்டுள்ளது.
அதே நேரத்தில், மதுப்பழக்கம் அவரது வாழ்க்கையில் மிகப்பெரிய பிரச்சினையாக இருக்கிறது. ஆண்டுதோறும் ஐயப்ப மாலை அணிந்து விரதம் மேற்கொள்ளும் காலத்தில், அதற்கு முற்றிலும் மாறான அமைதியான மனிதராக அவர் மாறுகிறார். இந்த இரு முரண்பட்ட குணங்களுக்கிடையே நகரும் கதாநாயகனின் வாழ்க்கையில், கிராமத்தில் பெண்கள் அடுத்தடுத்து மர்மமான முறையில் கொலை செய்யப்படுவது பெரும் அதிர்வை ஏற்படுத்துகிறது.
இந்த தொடர் கொலைகளுக்குப் பின்னால் இருப்பது யார்? அவற்றைத் தடுத்து நிறுத்த ரவி தேஜாவின் கதாபாத்திரத்தால் முடியுமா? என்பதற்கான விடைகளை நோக்கி கதை நகர்கிறது.
குடும்ப உறவுகளையும் ஆக்ஷன் மற்றும் சஸ்பென்ஸ் அம்சங்களையும் இணைத்து திரைக்கதையை அமைத்துள்ள இயக்குநர் சிவா நிர்வாணா, வழக்கமான குடும்பக் கதையிலிருந்து மாறுபட்ட அனுபவத்தை வழங்க முயன்றுள்ளார். குறிப்பாக, ரவி தேஜாவின் கோபத்தைப் பார்த்து அவரது மகளே பயப்படுவதாகக் கூறும் காட்சி டிரெய்லரில் கவனம் ஈர்க்கிறது. இது கதாநாயகனின் மனநிலையையும் குடும்பத்தினருடனான அவரது உறவையும் அழுத்தமாக வெளிப்படுத்துகிறது.
ரவி தேஜா தனது கதாபாத்திரத்தின் பல்வேறு பரிமாணங்களையும் சிறப்பாக வெளிப்படுத்தியுள்ளார். குடும்பத்தினரிடம் பாசம் காட்டும் மனிதராகவும், அநீதிக்கு எதிராக சீறிப் பாயும் கதாபாத்திரமாகவும் அவரது நடிப்பு மாறுபட்ட அனுபவத்தை வழங்குகிறது. மதுப்பழக்கம் மற்றும் ஐயப்ப விரதத்தின் போது வெளிப்படும் அமைதியான தன்மை ஆகிய இரண்டும் கதாபாத்திரத்திற்கு கூடுதல் சுவாரஸ்யத்தை ஏற்படுத்துகின்றன.
படத்தின் மனைவி கதாபாத்திரத்தில் பிரியா பவானி ஷங்கர் நடித்துள்ளார். கணவர் அமைதியான குடும்ப வாழ்க்கைக்குத் திரும்ப வேண்டும் என்ற எதிர்பார்ப்பை கொண்ட பெண்ணாக அவரது கதாபாத்திரம் அமைந்துள்ளது. ரவி தேஜா – மகள் உறவை பேபி நக்ஷத்ரா இயல்பாக வெளிப்படுத்தியுள்ளார்.
மேலும், சாய் குமார் குரு சுவாமி கதாபாத்திரத்திலும், ஸ்வாசிகா எதிர்மறை வேடத்திலும் நடித்துள்ளனர்.
டிரெய்லரின் இறுதியில் ரசிகர்கள் ஆவலுடன் எதிர்பார்த்து வரும் ‘மல்லெபுல பல்லக்கி’ பாடலின் சில காட்சிகள் இடம்பெற்றிருப்பதும் ரசிகர்களின் உற்சாகத்தை அதிகரித்துள்ளது.
குடும்ப பாசம் முதல் அதிரடி ஆக்ஷன் வரை, மர்மமான கொலைகள் முதல் த்ரில்லர் திருப்பங்கள் வரை பல்வேறு அம்சங்களை உள்ளடக்கியுள்ள ‘இருமுடி’, ஆகஸ்ட் 21ஆம் தேதி திரையரங்குகளில் வெளியாகிறது. வெளியாகியுள்ள டிரெய்லர் மூலம் படத்தின் மீதான எதிர்பார்ப்பு மேலும் அதிகரித்துள்ள நிலையில், ரவி தேஜாவின் மாறுபட்ட கதாபாத்திரம் ரசிகர்களுக்கு புதிய திரை அனுபவத்தை வழங்கும் என எதிர்பார்க்கப்படுகிறது.
