‘ஆர்எக்ஸ் 100’ திரைப்படத்தின் மூலம் ரசிகர்களிடம் பிரபலமான நடிகர் கார்த்திகேயா கும்மகொண்டா, தனது புதிய படமான ‘கம்பேக்’ குறித்த அதிகாரப்பூர்வ அறிவிப்பை வெளியிட்டுள்ளார். அவரது பிறந்தநாளை முன்னிட்டு இப்படத்தின் கிளிம்ப்ஸ் வெளியாகி கவனம் ஈர்த்துள்ளது.
இந்தப் படத்தின் மூலம் கார்த்திகேயா தனது திரைப்பயணத்தில் புதிய பொறுப்பை ஏற்றுள்ளார். தனது சொந்த தயாரிப்பு நிறுவனமான கார்த்திகேயா கிரியேட்டிவ் வொர்க்ஸ் சார்பில் இப்படத்தை தயாரிப்பதுடன், கதாநாயகனாக நடித்து, படத்தையும் இயக்குகிறார். அவரது மனைவி லோஹிதா ரெட்டி தயாரிப்பாளராக இணைந்துள்ளார். குடும்பத்தினரின் பங்களிப்புடன் உருவாகும் இப்படம் 2027ஆம் ஆண்டு திரையரங்குகளில் வெளியாகும் என அறிவிக்கப்பட்டுள்ளது.
‘கம்பேக்’ படத்தின் கிளிம்ப்ஸ், கார்த்திகேயா குத்துச்சண்டை வீரராக நடிப்பதை மையப்படுத்தி உருவாக்கப்பட்டுள்ளது. மூன்று ஆண்டுகளாக ஒரு குத்துச்சண்டை வீரர் குறித்த எந்தத் தகவலும் இல்லை என்ற குரல்வழி பதிவுடன் கிளிம்ப்ஸ் தொடங்குகிறது.
நீண்ட இடைவெளிக்குப் பிறகு அவர் மீண்டும் குத்துச்சண்டை களத்திற்குள் நுழையும்போது, அவரை பலரும் ஏற்கனவே மறந்துவிட்ட சூழல் உருவாகிறது. மூன்று ஆண்டுகளுக்குப் பிறகு மீண்டும் திரும்பும் அவரால் முன்புபோல் தாக்கத்தை ஏற்படுத்த முடியுமா என்ற கேள்வியும் எழுகிறது. அந்த மூன்று ஆண்டுகளில் அவரது வாழ்க்கையில் என்ன நடந்தது என்பது குறித்து எந்த தகவலையும் வெளியிடாமல், கதாநாயகனின் கம்பேக் எந்த அளவுக்கு சவால் நிறைந்ததாக இருக்கும் என்பதை மட்டும் கிளிம்ப்ஸ் உணர்த்துகிறது.
குத்துச்சண்டை உலகை இயல்பாகவும் நம்பகத்தன்மையுடனும் திரையில் பதிவு செய்யும் வகையில் கே.ஆர். குமார் மன்னேவின் தயாரிப்பு வடிவமைப்பு அமைந்துள்ளது.
கடின உழைப்பு, தனிப்பட்ட போராட்டம் மற்றும் உணர்வுகளுக்கு முக்கியத்துவம் கொடுத்து உருவாகும் இப்படத்தில் குத்துச்சண்டை பயிற்சிக் காட்சிகள் முக்கிய பங்கு வகிக்கின்றன. மீண்டும் போட்டிக் களத்திற்குத் திரும்புவதற்காக கதாநாயகன் எதிர்கொள்ளும் உடல் மற்றும் மனரீதியான போராட்டங்களும் கதையின் முக்கிய அம்சங்களாக இடம்பெறுகின்றன.
குத்துச்சண்டை வீரரின் கதாபாத்திரத்திற்காக கார்த்திகேயா தீவிரமான உடற்பயிற்சி மற்றும் தயாரிப்புகளை மேற்கொண்டுள்ளார். நடிகராக மட்டுமல்லாமல் இயக்குநராகவும் பணியாற்றுவதால், இந்தப் படம் அவரது திரைப்பயணத்தில் முக்கியமான படைப்பாக அமையும் என எதிர்பார்க்கப்படுகிறது.
‘கம்பேக்’ படத்திற்கு ஜெகதீஷ் சீகட்டி ஒளிப்பதிவு செய்கிறார். விஜய் புல்கான் இசையமைக்கிறார். கல்யாண் சூர்யபிரகாஷ் படத்தொகுப்பு பணிகளை மேற்கொள்கிறார். ஷில்பா தங்குதுரு ஆடை வடிவமைப்பாளராகவும், சூர்யா அக்கெல்லா கிரியேட்டிவ் இயக்குநராகவும் பணியாற்றுகின்றனர். சுதீர் தெலப்ரோலு நிர்வாக தயாரிப்பாளராக இணைந்துள்ளார்.
நடிகராக கார்த்திகேயாவுக்கு ஏற்பட்டிருந்த இடைவெளிக்கு முற்றுப்புள்ளி வைக்கும் வகையில் வெளியாகியுள்ள ‘கம்பேக்’, அவரது பிறந்தநாளில் அறிவிக்கப்பட்டிருப்பது கூடுதல் முக்கியத்துவத்தை பெற்றுள்ளது. நடிப்பு, இயக்கம், தயாரிப்பு என பல்வேறு பொறுப்புகளை ஒரே நேரத்தில் ஏற்றுள்ள கார்த்திகேயா, இந்தப் படத்தின் மூலம் தனது திரைப்பயணத்தில் புதிய அத்தியாயத்தை தொடங்குகிறார்.
