The India Story திரைப்படத்தின் பிரத்யேக போஸ்டர் ஏற்கனவே ரசிகர்களின் கவனத்தை ஈர்த்திருந்த நிலையில், தற்போது இப்படத்தின் டீசர் விரைவில் வெளியாகும் என தயாரிப்பாளர்கள் அதிகாரப்பூர்வமாக அறிவித்துள்ளனர். சமூக மற்றும் தேசிய முக்கியத்துவம் வாய்ந்த கதைக்களத்தில் உருவாகும் இந்த திரைப்படம், வெளியீட்டுக்கு முன்பே பெரும் எதிர்பார்ப்பை ஏற்படுத்தியுள்ளது.
காஜல் அகர்வால், ஷ்ரேயாஸ் தல்படே முதன்முறையாக இணைந்து நடித்துள்ள இந்த திரைப்படம், ரசாயன பொருட்களின் தவறான பயன்பாடு மற்றும் அதன் ஆபத்தான விளைவுகளை மையமாகக் கொண்டு உருவாகியுள்ளது. குறிப்பாக பூச்சிக்கொல்லி மருந்து சார்ந்த விவசாய முறைகள் பொதுச் சுகாதாரத்தில் ஏற்படுத்தும் தாக்கங்களை இப்படம் தீவிரமாக எடுத்துரைக்கிறது.
ஜீ ஸ்டுடியோஸ் வழங்கும் இந்த திரைப்படம், MIG புரொடக்ஷன் & ஸ்டுடியோஸ் நிறுவனத்துடன் இணைந்து தயாரிக்கப்பட்டுள்ளது. இயக்குநர் சேட்டன் DK இயக்கத்தில், சாகர் B. ஷிண்டே கதை எழுதி தயாரித்துள்ள இந்த படம், “The India Story: Slow Poison in Progress” என்ற துணைத்தலைப்புடன் உருவாகியுள்ளது.
சமீபத்தில் வெளியான போஸ்டர், ரசாயன மாசுபாடு மற்றும் அதன் மனித வாழ்க்கை மீதான தாக்கங்களை உணர்வுபூர்வமாக வெளிப்படுத்தி ரசிகர்களிடையே கவனத்தை ஈர்த்தது. ஒரு தனிநபர் அல்லது குடும்பத்தின் கதையை தாண்டி, நாடு முழுவதும் பலரது வாழ்க்கையை பாதிக்கும் ஒரு பெரிய சமூக நெருக்கடியை இப்படம் பிரதிபலிக்கிறது. தொழில்துறை அலட்சியத்தால் ஏற்படும் மறைமுக ஆபத்துகள் மற்றும் விழிப்புணர்வின் அவசியத்தை மையமாகக் கொண்டு இந்த திரைப்படம் உருவாகியுள்ளது.
தற்போது வெளியாகவுள்ள டீசர், இந்த தீவிரமான உலகத்தை ரசிகர்களுக்கு மேலும் நெருக்கமாக அறிமுகப்படுத்தும் என படக்குழு தெரிவித்துள்ளது. மேலும், இப்படத்தின் முக்கியத்துவம் வாய்ந்த கதைக்களத்தின் மீதான எதிர்பார்ப்பை டீசர் இன்னும் அதிகரிக்கும் என்றும் கூறப்பட்டுள்ளது.
காஜல் அகர்வால், ஷ்ரேயாஸ் தல்படே ஆகியோர் தங்களது உணர்ச்சிப்பூர்வமான மற்றும் தீவிரமான நடிப்பின் மூலம் கதைக்கு வலிமை சேர்த்திருப்பார்கள் என எதிர்பார்க்கப்படுகிறது.
சுமித் பாகடே, அனிதா ஜாதவ், விநாயக் சைதானி, கல்பேஷ் ஷா, தேவ்யானி கொராடே மற்றும் பிரேம் ஜோஷி ஆகியோர் இணை தயாரிப்பாளர்களாக பணியாற்றியுள்ளனர். நிஷாந்த் பக்வத் ஒளிப்பதிவு செய்துள்ள இப்படத்திற்கு மங்கேஷ் தாக்டே இசையமைத்துள்ளார். ஆஷிஷ் மாத்ரே படத்தொகுப்பை கவனிக்க, ஷகீல் அஜாமி பாடல்களை எழுதியுள்ளார். அன்மோல் பாவே ஒலி வடிவமைப்பை மேற்கொண்டுள்ளார்.
தமிழ், தெலுங்கு மற்றும் இந்தி மொழிகளில் உருவாகியுள்ள “தி இந்தியா ஸ்டோரி” திரைப்படம், வரும் ஜூலை 24 ஆம் தேதி உலகம் முழுவதும் திரையரங்குகளில் வெளியாகவுள்ளது.
