பூரி ஜெகன்நாத் இயக்கத்தில் விஜய் சேதுபதி – “ஸ்லம் டாக்” படத்தின் முக்கிய அப்டேட்!

‘மக்கள் செல்வன்’ விஜய் சேதுபதி கதையின் நாயகனாக நடித்துள்ள ‘ஸ்லம் டாக்: 33 டெம்பிள் ரோடு’ (Slum Dog: 33 Temple Road) திரைப்படத்தின் படப்பிடிப்பு முழுமையாக நிறைவடைந்துள்ளது. இயக்குநர் பூரி ஜெகன்நாத் இயக்கத்தில் உருவாகியுள்ள இப்படத்தின் இறுதிக்கட்டப் படப்பிடிப்பு இன்று ஹைதராபாத்தில் நடைபெற்றதைத் தொடர்ந்து, படப்பிடிப்புப் பணிகள் முடிவுக்கு வந்துள்ளன.

பூரி கனெக்ட்ஸ் (Puri Connects) நிறுவனம் சார்பில் பூரி ஜெகன்நாத் மற்றும் சார்மி கவுர் இணைந்து தயாரித்துள்ள இப்படம், ஏற்கெனவே வெளியான விளம்பரக் காணொளிகள் மற்றும் முன்னோட்டங்கள் மூலம் ரசிகர்களின் கவனத்தை ஈர்த்துள்ளது. தனக்கே உரிய வித்தியாசமான கதை சொல்லல் மற்றும் வேகமான திரைமொழிக்குப் பெயர் பெற்ற பூரி ஜெகன்நாத், அனைத்து தரப்பு ரசிகர்களையும் கவரும் வகையில் இப்படத்தை உருவாக்கியுள்ளார்.

இதுவரை வெளியிடப்பட்ட கதாபாத்திர அறிமுகக் காணொளிகள், படத்தில் இடம்பெறும் முக்கியக் கதாபாத்திரங்களின் தனித்துவத்தையும் கதையின் பல்வேறு பரிமாணங்களையும் வெளிப்படுத்தியுள்ளன. இதனால் படத்தின் மீதான எதிர்பார்ப்பு தொடர்ந்து அதிகரித்து வருகிறது.

படப்பிடிப்பு நிறைவடைந்துள்ள நிலையில், அடுத்தகட்டமாகப் படத்தின் வெளியீட்டுக்கான பணிகளில் படக்குழுவினர் கவனம் செலுத்தி வருகின்றனர். திரைப்படத்தை விரைவில் திரையரங்குகளில் வெளியிடத் திட்டமிட்டுள்ள நிலையில், வெளியீட்டுத் தேதி குறித்த அதிகாரப்பூர்வ அறிவிப்பு விரைவில் வெளியாகும் என எதிர்பார்க்கப்படுகிறது.

விஜய் சேதுபதிக்கு ஜோடியாக சம்யுக்தா நடித்துள்ளார். மேலும், தபு, துனியா விஜய், ஜரினா வஹாப், பிரம்மாஜி, வி.டி.வி. கணேஷ் உள்ளிட்ட பலர் முக்கியக் கதாபாத்திரங்களில் நடித்துள்ளனர். ஏற்கெனவே வெளியான அறிமுகக் காணொளிகள், படத்தில் ஒவ்வொரு கதாபாத்திரத்திற்கும் முக்கியத்துவம் அளிக்கப்பட்டிருப்பதை உணர்த்தியுள்ளன.

தொழில்நுட்பக் குழுவில் சாம் கே. நாயுடு ஒளிப்பதிவாளராகப் பணியாற்றியுள்ளார். ஹர்ஷவர்தன் ராமேஸ்வர் இசையமைக்க, சந்தோஷ் நூஜில்லா படத்தொகுப்புப் பணிகளை மேற்கொண்டுள்ளார்.

தமிழ், தெலுங்கு, மலையாளம், கன்னடம் மற்றும் இந்தி என ஐந்து மொழிகளில் பான்-இந்தியா திரைப்படமாக ‘ஸ்லம் டாக்: 33 டெம்பிள் ரோடு’ வெளியாகவுள்ளது. விஜய் சேதுபதி மற்றும் பூரி ஜெகன்நாத் இணைந்துள்ள இந்தப் புதிய கூட்டணி, திரையரங்குகளில் எந்த மாதிரியான அனுபவத்தை வழங்கப்போகிறது என்ற எதிர்பார்ப்பு ரசிகர்கள் மத்தியில் உருவாகியுள்ளது.