“ஹார்டின்” திரை விமர்சனம்

“ஹார்டின்” கிஷோர் குமார் இயக்கத்தில் ட்ரைடண்ட் ஆர்ட்ஸ் மற்றும் ஸ்டெப் ஒன் ஸ்டுடியோஸ் தயாரிப்பில் உருவாகியிருக்கும் இந்த படத்திற்கு இசை ராஜேஷ் முருகேசன். இந்த படத்தில் மடோனா செபாஸ்டின், சனந்த் ரெட்டி, இமயா டி., வாட்ஸ்அப் மணி, உமா பத்மநாபன், பிரகதி மற்றும் பலர் நடித்துள்ளனர்.

ராஜஸ்தானின் ஜெய்ப்பூரில் தமிழ் உணவகம் நடத்தி வரும் சனந்த், அங்கு ஐடி நிறுவனத்தில் பணிபுரியும் இமயாவுடன் நட்பாகி, அந்த நட்பு காதலாக மலர்கிறது. திருமணம் செய்யும் நோக்கில் இருவரும் தமிழகம் வரும்போது நிகழும் விபத்தில், சனந்த் தனது வாழ்க்கையின் சில வருட நினைவுகளை இழக்கிறார். குறிப்பாக, இமயாவுடனான காதல் நினைவுகள் முற்றிலும் அழிந்துவிடுகின்றன.

பழைய கல்லூரி காதலியான மடோனா செபாஸ்டினைத் தேடி ஊட்டிக்குச் செல்லும் சனந்துடன் இமயாவும் பயணிக்கிறார். அங்கு நடக்கும் உணர்வுபூர்வமான சம்பவங்கள், காதல், நினைவுகள் மற்றும் உறவுகளின் போராட்டமே “ஹார்டின்” படத்தின் மீதிக்கதை.

இயக்குநர் கிஷோர் குமார், முக்கோணக் காதலை நினைவிழப்பு என்ற சுவாரஸ்யமான அம்சத்துடன் இணைத்து, மென்மையான காதல் கதையாக திரையில் கொண்டு வந்துள்ளார். முதல் பாதியில் ஜெய்ப்பூரின் அழகிய இடங்கள், வண்ணமயமான காட்சிகள் மற்றும் இளமைத் ததும்பும் காதல் தருணங்கள் ரசிகர்களை கவர்கின்றன. இரண்டாம் பாதியில் உணர்வுகளுக்கு முக்கியத்துவம் கொடுத்து கதையை நகர்த்தியிருப்பது பலம் சேர்க்கிறது.

ஹீரோவாக நடித்துள்ள சனந்த், காதல், குழப்பம், நினைவிழப்பு என பல்வேறு உணர்வுகளை இயல்பாக வெளிப்படுத்தியுள்ளார். குறிப்பாக கிளைமாக்ஸ் காட்சிகளில் அவரது நடிப்பு கவனம் பெறுகிறது.

நாயகியாக அறிமுகமாகியுள்ள இமயா, இயல்பான நடிப்பால் ஈர்க்கிறார். பக்கத்து வீட்டுப் பெண் போன்ற எளிமையான தோற்றமும், காதல் மற்றும் உணர்ச்சிகரமான காட்சிகளில் அவர் வெளிப்படுத்தும் வெளிப்பாடுகளும் கதாபாத்திரத்திற்கு பலம் சேர்க்கின்றன.

மடோனா செபாஸ்டின், தனது ஸ்டைலான தோற்றத்தாலும் அமைதியான நடிப்பாலும் கவர்கிறார். குறைந்த திரைநேரம் இருந்தாலும் கதையின் முக்கியமான உணர்வுகளை தாங்கிச் செல்கிறார்.

வாட்ஸ்அப் மணி தனது நகைச்சுவை காட்சிகளால் படத்திற்கு லேசான கலகலப்பை சேர்க்கிறார். பிரகதி உள்ளிட்ட துணை நடிகர்களும் தங்களுக்கான பங்களிப்பை சிறப்பாக வழங்கியுள்ளனர்.

ராஜேஷ் முருகேசன் இசையில் பாடல்களும் பின்னணி இசையும் காதல் காட்சிகளுக்கு மென்மையான உணர்வை சேர்க்கின்றன.

முகேஸ்வரன் வி. ஒளிப்பதிவு ராஜஸ்தான் மற்றும் ஊட்டியின் இயற்கை அழகை அழகாகப் பதிவு செய்துள்ள விதம் படத்தின் காட்சியமைப்பை மேலும் ரசிக்க வைக்கிறது.

பாரத் விக்ரமன் படத்தொகுப்பு, அவருடைய பணியை சிறப்பாக செய்திருக்கிறார். இசைக்கு தகுந்தது போல் காட்சிகளை தொகுத்திருப்பது பாராட்டுக்குரியது.

காதல், நினைவுகள், உறவுகளின் மதிப்பு மற்றும் வாழ்க்கையின் இரண்டாவது வாய்ப்பு போன்ற உணர்வுகளை மையமாக வைத்து உருவாகியுள்ள ‘ஹார்ட்டின்’, மென்மையான காதல் கதைகளை விரும்பும் ரசிகர்களுக்கு ரசிக்கக்கூடிய திரையரங்கு அனுபவத்தை வழங்குகிறது. சில திரைக்கதை அம்சங்கள் பரிச்சயமானதாக தோன்றினாலும், நடிகர்களின் இயல்பான நடிப்பும், அழகான காட்சியமைப்பும், உணர்வுபூர்வமான தருணங்களும் படத்தை சுவாரஸ்யமாக மாற்றுகின்றன.