இலங்கை மக்களின் வாழ்வியல், இழப்புகள், தாய்மண்ணின் மீதான பாசம் ஆகியவற்றை மையமாக வைத்து உருவாகியுள்ள ‘தாய்நிலம்’ திரைப்படம் அக்டோபர் 9-ம் தேதி திரையரங்குகளில் வெளியாகிறது. நெனி என்டர்டெயின்மென்ட்ஸ் பிரைவேட் லிமிடெட் தயாரிப்பில், அறிமுக இயக்குநர் அபிலாஷ் ஜி. தேவ் இயக்கியுள்ள இப்படத்தின் டிரெய்லர் சமீபத்தில் வெளியாகி ரசிகர்கள் மத்தியில் கவனம் பெற்றுள்ளது.
இலங்கையில் நடைபெற்ற போருக்குப் பின்னணியில் உருவாகியுள்ள இப்படத்தின் கதை, 2016-ம் ஆண்டில் உறவுகளையும் சொந்த மண்ணையும் இழந்து தமிழ்நாட்டிற்கு வரும் ஒரு தந்தை மற்றும் அவரது சிறுமகளைச் சுற்றி நகர்கிறது.
தாய்நிலத்தை விட்டு வெளியேறிய பிறகு, முற்றிலும் புதிய சூழலில் வாழ்க்கையை மீண்டும் தொடங்க வேண்டிய கட்டாயத்திற்கு அவர்கள் தள்ளப்படுகின்றனர். அந்தப் புதிய வாழ்க்கையில் அவர்கள் சந்திக்கும் சவால்கள், எதிர்பாராத மனிதர்களின் அறிமுகம், கிடைக்கும் உதவிகள் மற்றும் தந்தை – மகளின் உறவு ஆகியவை கதையின் முக்கிய அம்சங்களாக இடம்பெற்றுள்ளன.
எல்லாவற்றையும் இழந்த நிலையிலும் தனது மகளுக்கு நல்ல எதிர்காலத்தை உருவாக்க வேண்டும் என்பதே தந்தையின் ஒரே இலக்காக இருக்கிறது. அந்த இலக்கை அடைவதற்காக அவர் மேற்கொள்ளும் முயற்சிகளும், புதிய வாழ்க்கையில் கிடைக்கும் வாய்ப்புகளும், அவரைச் சுற்றியுள்ள மனிதர்களின் அன்பும் படத்தின் கதையோட்டத்தில் முக்கிய இடம் பெறுகின்றன.
சொந்த மண்ணை விட்டு வெளியேறிய ஒருவருக்கு கிடைக்கும் புதிய சுதந்திரத்துக்கும், மனதுக்குள் தொடர்ந்து வாழும் தாய்நிலத்தின் நினைவுகளுக்கும் இடையிலான உணர்வுப் போராட்டத்தை ‘தாய்நிலம்’ பதிவு செய்கிறது.
இலங்கை மக்களின் வாழ்க்கையில் ஏற்பட்ட இழப்புகள் மற்றும் அவர்கள் எதிர்கொண்ட வலிகளில் அதிகம் பேசப்படாத சில பகுதிகளையும் கதையின் வழியாக பதிவு செய்ய இப்படம் முயற்சித்துள்ளது. தாய்நிலத்தை இழந்து வேறொரு இடத்தில் வாழ்க்கையை மீண்டும் கட்டியெழுப்பும் மனிதர்களின் மனநிலை, உறவுகள், எதிர்பார்ப்புகள் மற்றும் எதிர்கால கனவுகள் ஆகியவை படத்தின் முக்கிய கருப்பொருள்களாக அமைந்துள்ளன.
டாக்டர் அமர் ராமச்சந்திரன் மற்றும் நேகா அமர் ஆகியோர் முதன்மை கதாபாத்திரங்களில் நடித்துள்ளனர். இவர்களுடன் பாலாசிங், தீபக் பிரபாகர், பத்மஜா, நிமிஷா நம்பியார், குரு தட்சணா, தளபதி ஆனந்த், சரவணன் சொக்கம்பட்டி உள்ளிட்டோர் முக்கிய வேடங்களில் நடித்துள்ளனர்.
அபிலாஷ் ஜி. தேவ் இயக்கியுள்ள இப்படத்திற்கு பிரசாந்த் பிரணவம் ஒளிப்பதிவு செய்துள்ளார். ஔசேப்பச்சன் இசையமைப்பதுடன், பின்னணி இசையையும் கவனித்துள்ளார். படத்தொகுப்பு பணிகளை தீஜோ பி. வர்கீஸ் மேற்கொண்டுள்ளார். கலை இயக்கத்தை கைலாஸ் திரிப்பூனிதுறை கவனிக்க, மிக்ஸிங் பணிகளை ராஜாகிருஷ்ணன் மேற்கொண்டுள்ளார்.
திரையரங்க வெளியீட்டிற்கு முன்பாகவே ‘தாய்நிலம்’ பல்வேறு சர்வதேச திரைப்பட விழாக்களில் திரையிடப்பட்டு கவனம் பெற்றுள்ளது.
Toronto Tamil Film Festival – Canada, Luleå International Film Festival – Sweden மற்றும் Catharsis International Film Festival – Belgium ஆகிய திரைப்பட விழாக்களில் இப்படம் Official Selection ஆக இடம்பெற்றுள்ளது.
மேலும், Crown Wood International Film Festival-ல் Best Indian Film, Seventh Art Independent International Film Festival-ல் Best Original Score, Tamil Nadu International Film Festival-ல் Best Debut Filmmaker மற்றும் Best Narrative Feature Film – Special Mention, Cosmos International Film Festival-ல் Best Cameraman மற்றும் Best Debut Director உள்ளிட்ட பல்வேறு அங்கீகாரங்களையும் இப்படம் பெற்றுள்ளது.
சமீபத்தில் வெளியான ‘தாய்நிலம்’ திரைப்படத்தின் டிரெய்லர், கதையின் பின்னணி மற்றும் கதாபாத்திரங்களின் உணர்வுகளை அழுத்தமாக வெளிப்படுத்தி ரசிகர்களின் கவனத்தை ஈர்த்துள்ளது. சர்வதேச திரைப்பட விழாக்களில் கிடைத்த அங்கீகாரங்களைத் தொடர்ந்து டிரெய்லருக்கும் கிடைத்துள்ள வரவேற்பு படத்தின் மீதான எதிர்பார்ப்பை அதிகரித்துள்ளது.
