கருணாஸ், நிமிஷா சஜயன் நடிப்பில் வெளியான ‘என்ன விலை’ திரைப்படம், அட்லாண்டா இந்தியத் திரைப்பட விழாவில் சிறந்த ஒளிப்பதிவுக்கான விருதை வென்றுள்ளது. இப்படத்தின் ஒளிப்பதிவாளர் ஆல்பி ஆண்டனிக்கு இந்த விருது வழங்கப்பட்டுள்ளது. அக்டோபர் 3ஆம் தேதி நடைபெற்ற விழாவில், அவருக்குப் பதிலாகப் படத்தின் தயாரிப்பாளர் அனுகோபால் வேணுகோபாலன் விருதைப் பெற்றுக்கொண்டார்.
தேசிய விருது பெற்ற இயக்குநர் சஜீவ் பாழூர் இயக்கத்தில் உருவான ‘என்ன விலை’ திரைப்படத்தில் கருணாஸ், நிமிஷா சஜயன் உள்ளிட்ட பலர் நடித்துள்ளனர். ராமேஸ்வரத்தின் கடலோரப் பின்னணியில் அமைந்துள்ள இப்படம், எதிர்பாராத சூழலைச் சந்திக்கும் ஒரு மீனவரின் வாழ்க்கையை மையமாகக் கொண்டுள்ளது. மனிதநேயம், நீதி, சுயமரியாதை மற்றும் மன உறுதி போன்ற அம்சங்களையும் இப்படம் எடுத்துரைக்கிறது.
சர்வதேசத் திரைப்பட விழாவில் கிடைத்துள்ள இந்த விருது, ‘என்ன விலை’ படத்தின் பயணத்தில் மற்றுமொரு குறிப்பிடத்தக்க சாதனையாக அமைந்துள்ளது. தமிழ் சினிமாவை உலகளாவிய பார்வையாளர்களிடம் கொண்டு சேர்க்கும் கலாமயா சினிவெர்ஸின் முயற்சிக்கும் இந்த அங்கீகாரம் கூடுதல் சிறப்பைச் சேர்த்துள்ளது.
விருது பெற்றது குறித்து ஒளிப்பதிவாளர் ஆல்பி ஆண்டனி கூறுகையில், “அட்லாண்டா இந்தியத் திரைப்பட விழாவில் சிறந்த ஒளிப்பதிவுக்கான விருதைப் பெறுவது மிகுந்த மகிழ்ச்சியையும் பெருமையையும் அளிக்கிறது. ‘என்ன விலை’ திரைப்படத்தின் கதை மற்றும் கதாபாத்திரங்களுடன் அதன் காட்சிகள் நெருக்கமாக இணைந்துள்ளன. அந்த உலகத்தைத் திரையில் காட்சிகளாக உருவாக்கும் வாய்ப்பு கிடைத்ததைப் பாக்கியமாகக் கருதுகிறேன். இந்த விருதை இயக்குநர் சஜீவ் பாழூர், தயாரிப்பாளர்கள் ஜித்தேஷ் விஸ்வம்பரன், அனுகோபால் வேணுகோபாலன் உள்ளிட்ட ஒட்டுமொத்தப் படக்குழுவினருடனும் பகிர்ந்துகொள்கிறேன்” என்றார்.
தயாரிப்பாளர்கள் ஜித்தேஷ் விஸ்வம்பரன் மற்றும் அனுகோபால் வேணுகோபாலன் கூறுகையில், “ஆல்பி ஆண்டனியின் ஒளிப்பதிவுக்குச் சர்வதேச அளவில் அங்கீகாரம் கிடைத்திருப்பது ‘என்ன விலை’ படக்குழுவினர் அனைவருக்கும் மகிழ்ச்சியையும் பெருமையையும் அளிக்கிறது. படத்தின் காட்சியமைப்புக்கும், அதற்காக உழைத்த ஒட்டுமொத்தக் குழுவினரின் முயற்சிக்கும் கிடைத்த அங்கீகாரமாகவே இந்த விருதைப் பார்க்கிறோம்” என்றனர்.
அட்லாண்டா இந்தியத் திரைப்பட விழாவில் கிடைத்துள்ள இந்த விருது, ‘என்ன விலை’ திரைப்படத்தின் சர்வதேசப் பயணத்தில் முக்கியமான மைல்கல்லாக அமைந்துள்ளது.
