“பாலன்: தி பாய்” சிதம்பரம் இயக்கத்தில் வெங்கட் கே. நாராயணா, ஷைலஜா தேசாய் ஃபென் தயாரிப்பில் உருவாகியிருக்கும் இந்த படத்திற்கு இசை சுஷின் ஷியாம். இந்த படத்தில் பர்சானா பலதிங்கல், அதிசேஷன் கே ஆர், முஹம்மது ஜினன், டோவினோ தாமஸ், ஜீன், கிரிஷ் ஏ.டி. மற்றும் பலர் நடித்துள்ளனர்.
சிறைத் தண்டனை அனுபவித்துக் கொண்டிருக்கும் கர்ப்பிணிப் பெண்ணான ஃபர்சானா, சிறையிலேயே ஒரு ஆண் குழந்தைக்கு தாயாகிறார். சில ஆண்டுகளுக்குப் பிறகு விடுதலையாகும் அவர், கடந்த காலத்தில் சந்தித்த துயரங்களாலும் ஏமாற்றங்களாலும் யாரையும் எளிதில் நம்ப முடியாத மனநிலையுடன் தனது மகனை அழைத்துக் கொண்டு இடம் மாறி இடம் மாறி வாழ்கிறார்.
அவ்வாறு பயணிக்கும் வாழ்க்கையில், தனிமையில் வாழும் வயதான பெண் ஒருவரைப் பராமரிக்கும் வேலை கிடைக்கிறது. பாதுகாப்பான சூழல் கிடைத்ததால் அங்கேயே நிரந்தரமாக தங்க முடிவு செய்யும் ஃபர்சானா, தனது மகனை பள்ளியிலும் சேர்க்கிறார். ஆனால் கடந்த காலத்தின் நிழல்கள் அவரை தொடர்ந்து துரத்துவதால், மகனை பள்ளியில் இருந்து அழைத்துச் செல்லும் வரை ஒரு குறிப்பிட்ட இடத்தில் காத்திருக்க வேண்டும் என்று அறிவுறுத்துகிறார்.
ஒரு நாள் வழக்கம்போல் காத்திருந்த சிறுவனை அழைத்துச் செல்ல ஃபர்சானா வரவில்லை. நீண்ட நேரம் கடந்ததால் அங்கிருந்தவர்கள் குழந்தையை காவல்துறையிடம் ஒப்படைக்கின்றனர். அதன் பின்னர் தாய்-மகன் வாழ்க்கையில் என்ன நடந்தது, அவர்கள் மீண்டும் ஒன்றிணைந்தார்களா என்பதுதான் படத்தின் மையக் கதையாக விரிகிறது.
ஃபர்சானா பலதிங்கல் தனது கதாபாத்திரத்தை மிகுந்த நம்பகத்தன்மையுடன் சுமந்திருக்கிறார். மனதில் அடங்கிய பயம், குற்ற உணர்வு, பாதுகாப்பற்ற நிலை போன்ற உணர்வுகளை வசனங்களை விட முகபாவனைகள் மூலமாகவே அவர் சிறப்பாக வெளிப்படுத்தியுள்ளார். அவரது இயல்பான நடிப்பு படத்தின் உணர்ச்சி ஆழத்தை அதிகரிக்கிறது.
சிறுவன் பாலனாக நடித்துள்ள ஆதிசேஷன் கே.ஆர்., மிகவும் கட்டுப்பாடான மற்றும் முதிர்ச்சியான நடிப்பை வெளிப்படுத்தியுள்ளார். அதிக வசனங்கள் இல்லாமலேயே கண்கள் மற்றும் உடல்மொழி மூலம் தனது ஏக்கத்தையும், அம்மாவை தேடும் தவிப்பையும் வெளிப்படுத்துகிறார்.
வளர்ந்த பாலனாக வரும் ஜினனின் நடிப்பும் கதையின் உணர்வுப்பூர்வமான பகுதிகளுக்கு வலுசேர்க்கிறது. காவல்துறை அதிகாரியாக நடித்துள்ள ஜீன் பவுல் லால் தனது கதாபாத்திரத்தின் உள் கோபத்தையும் பழிவாங்கும் மனநிலையையும் நுட்பமாக வெளிப்படுத்தியுள்ளார்.
சிறப்பு தோற்றத்தில் வரும் டோவினோ தாமஸ் குறுகிய நேரமே திரையில் தோன்றினாலும், தனது தனித்துவமான திரை ஆளுமையால் கவனம் ஈர்க்கிறார். கிரிஷ் ஏ.டி உள்ளிட்ட மற்ற நடிகர்களும் தங்களுக்கான பங்களிப்பை சிறப்பாக வழங்கியுள்ளனர்.
ஒளிப்பதிவாளர் ஷைஜு காலித், காட்சிகளின் அமைதியையும், கதாபாத்திரங்களின் தனிமையையும் அழகாக பதிவு செய்துள்ளார். இயற்கை சூழல்களும், இடங்களும் கதையின் உணர்வுகளோடு ஒன்றிணைந்து பயணிக்கின்றன.
சுஷின் ஷாமின் பின்னணி இசை படத்தின் உணர்ச்சி மற்றும் பதற்ற தருணங்களை மேலும் வலுப்படுத்துகிறது. குறிப்பாக சில முக்கியமான காட்சிகளில் இசை கதையின் தாக்கத்தை பல மடங்கு உயர்த்துகிறது.
விவேக் ஹர்ஷனின் படத்தொகுப்பு படத்தை எந்த இடத்திலும் சோர்வடைய விடாமல் நகர்த்துகிறது. மெதுவாக நகரும் கதை கூட பார்வையாளர்களின் கவனத்தை தொடர்ந்து தக்க வைத்துக் கொள்கிறது.
கதையாசிரியர் ஜித்து மாதவன் மிகவும் எளிமையான கருவை எடுத்துக்கொண்டு அதனை சுவாரஸ்யமான திரைக்கதையாக வடிவமைத்துள்ளார். தாய்-மகன் உறவு, பிரிவு, ஏக்கம் ஆகியவற்றை பரபரப்பும் மர்மமும் கலந்த அணுகுமுறையில் சொல்லியிருப்பது படத்தின் மிகப்பெரிய பலமாக அமைகிறது.
‘மஞ்சுமல் பாய்ஸ்’ வெற்றிக்குப் பிறகு இயக்குநர் சிதம்பரம் வழங்கியுள்ள இந்தப் படம், வெளிப்படையான பிரம்மாண்டங்களின்றி உணர்வுகளின் வலிமையால் பார்வையாளர்களை ஈர்க்கிறது. அமைதியான சூழல், எதிர்பாராத திருப்பங்கள் மற்றும் மனதைத் தொடும் கதையம்சங்களுடன் நகரும் ‘பாலன்’, இறுதிவரை ஆர்வத்தை குறைக்காமல் கொண்டு செல்லும் தரமான திரைப்பயணமாக அமைந்துள்ளது.
“பாலன்: தி பாய்” படத்திற்கு மதிப்பீடு 4/5
மொத்தத்தில், “பாலன்: தி பாய்” மனதைத் தொடும்
