சூப்பர் ஸ்டார் ரஜினிகாந்த் நடிப்பில், ராஜ்கமல் பிலிம்ஸ் இன்டர்நேஷனல் தயாரிக்கும் புதிய திரைப்படமான ‘தர்மன்’ இன்று பூஜையுடன் படப்பிடிப்பைத் தொடங்கியது. இதனுடன் படத்தின் தலைப்பும், மாஸ் ஃபர்ஸ்ட் லுக் போஸ்டரும் வெளியாகி ரசிகர்களிடையே பெரும் எதிர்பார்ப்பை ஏற்படுத்தியுள்ளது.
இந்திய சினிமாவின் இரண்டு மாபெரும் நட்சத்திரங்களான கமல்ஹாசன் மற்றும் ரஜினிகாந்த், ஐம்பது ஆண்டுகளுக்கும் மேலான நட்பைப் பகிர்ந்து வரும் நிலையில், கமல்ஹாசனின் தயாரிப்பில் ரஜினிகாந்த் கதாநாயகனாக நடிக்கும் முதல் திரைப்படமாக ‘தர்மன்’ உருவாகிறது. இதனால் இந்த அறிவிப்பு திரையுலகில் பெரும் கவனத்தை ஈர்த்துள்ளது.
‘ஓ மை கடவுளே’, ‘டிராகன்’ போன்ற வெற்றிப் படங்களை இயக்கிய இளம் இயக்குநர் அஸ்வத் மாரிமுத்து இப்படத்தை இயக்குகிறார். இசை அமைப்பாளராக அனிருத் ரவிச்சந்தர் இணைந்துள்ள நிலையில், தென்னிந்திய சினிமாவின் முன்னணி நடிகைகளான சிம்ரன் மற்றும் ராஷி கன்னா முக்கிய கதாபாத்திரங்களில் நடிக்கின்றனர்.
தேசிய விருது பெற்ற அன்பரிவ் மாஸ்டர்ஸ் சண்டைக் காட்சிகளை வடிவமைக்க, நிகேத் பொம்மிரெட்டி ஒளிப்பதிவு செய்கிறார். தயாரிப்பு வடிவமைப்பை கார்த்திக் ராஜ்குமார், படத்தொகுப்பை பிரதீப் ஈ. ராகவ், கலை இயக்கத்தை அண்ணாதுரை கவனிக்கின்றனர். மேலும், உலகளாவிய நிறுவனமான டிஸ்னியும் இணை தயாரிப்பாளராக இணைந்திருப்பது படத்தின் பிரம்மாண்டத்தை வெளிப்படுத்துகிறது.
ராஜ்கமல் பிலிம்ஸ் இன்டர்நேஷனலின் முக்கிய மைல்கல் திரைப்படமாக உருவாகும் ‘தர்மன்’ படத்தின் தொடக்க விழா இன்று சென்னையில் கோலாகலமாக நடைபெற்றது. இதில் கலைப்புலி எஸ். தாணு, அன்புச்செழியன், ஆர்.கே. செல்வமணி, லிங்குசாமி உள்ளிட்ட திரைப்படத் துறையின் முன்னணி பிரமுகர்கள் மற்றும் ஊடகத் தலைவர்கள் பலர் கலந்துகொண்டு படக்குழுவினருக்கு வாழ்த்து தெரிவித்தனர்.
ரஜினிகாந்த் – கமல்ஹாசன் கூட்டணியின் இந்த வரலாற்றுச் சந்திப்பு, அஸ்வத் மாரிமுத்துவின் இயக்கம், அனிருத்தின் இசை மற்றும் நட்சத்திர பட்டாளத்தின் இணைவு ஆகியவற்றால் ‘தர்மன்’ தற்போது இந்திய சினிமாவின் மிகவும் எதிர்பார்க்கப்படும் திரைப்படங்களில் ஒன்றாக மாறியுள்ளது.
