சமூகத்தில் தாக்கத்தை ஏற்படுத்தும் முக்கியமான பிரச்சினைகளை நகைச்சுவை மற்றும் பொழுதுபோக்கு அம்சங்களுடன் மக்களிடம் கொண்டு சேர்ப்பதில் தமிழ் சினிமா தொடர்ந்து கவனம் செலுத்தி வருகிறது. அந்த வகையில், மது பழக்கத்தின் பாதிப்புகளை மையமாக வைத்து நகைச்சுவை, காதல், குடும்ப உணர்வுகள் மற்றும் சமூக விழிப்புணர்வு என பல்வேறு அம்சங்களுடன் உருவாகியுள்ள திரைப்படம் ‘நல்லபடம்’.
C. பிரபுராம் இயக்கியுள்ள இப்படத்தில் டாக்டர் A. ஹரிஷ் கதாநாயகனாகவும், தனலட்சுமி கதாநாயகியாகவும் நடித்துள்ளனர். இப்படம் வரும் செப்டம்பர் 18-ம் தேதி உலகம் முழுவதும் திரையரங்குகளில் வெளியாகிறது.
‘நல்லபடம்’ திரைப்படத்தின் மையக் கதாபாத்திரமாக குமரன் இடம்பெற்றுள்ளார். மதுவுக்கு அடிமையாக இருக்கும் அவருக்கு, அவரது தாயார் தொடர்ந்து பக்கபலமாக இருக்கிறார். அதேநேரத்தில், குமரனின் குடிப்பழக்கத்தை அவரது சகோதரி அமுதா கடுமையாக எதிர்த்து வருகிறார். குமரனை அந்தப் பழக்கத்திலிருந்து மீட்டெடுக்க அவரது காதலியும் பல்வேறு முயற்சிகளை மேற்கொள்கிறார்.
இதற்கிடையில், மதுவை விரும்பும் குமரனைப் போன்ற சிலர் ஒன்று சேர்ந்து புதிய அமைப்பை உருவாக்குகின்றனர். அந்த அமைப்பின் தலைவராக குமரன் தேர்வு செய்யப்படுகிறார். இந்நிலையில், நாடு முழுவதும் மதுவுக்கு அரசு தடை விதிக்கப்போவதாக அறிவிப்பு வெளியாகிறது.
இதனால், தனது அன்றாட வாழ்க்கையின் ஒரு பகுதியாகவே மாறிவிட்ட மதுவை விட்டு எப்படி வாழ்வது என்ற கேள்வி குமரனுக்கு மிகப்பெரிய சவாலாகிறது. அதன் பிறகு அவரது வாழ்க்கையில் ஏற்படும் எதிர்பாராத மாற்றங்களும், புதிய சூழ்நிலையை சமாளிக்க அவர் சந்திக்கும் வேடிக்கையான சம்பவங்களும் படத்தின் கதையை நகர்த்துகின்றன.
மது பழக்கம் ஒருவரது வாழ்க்கையை மட்டுமின்றி, அவரது குடும்பத்தையும் சுற்றியுள்ள சமூகத்தையும் எவ்வாறு பாதிக்கிறது என்பதை ‘நல்லபடம்’ திரைப்படம் பதிவு செய்கிறது. அதேசமயம், கருத்தை மட்டும் முன்வைக்காமல் நகைச்சுவை, காதல், சென்டிமென்ட் மற்றும் வணிகரீதியான பொழுதுபோக்கு அம்சங்களையும் கதையுடன் இணைத்துள்ளனர்.
மதுவுக்கு அடிமையான ஒருவரின் வாழ்க்கையில் ஏற்படும் மாற்றங்களை மையமாகக் கொண்ட வித்தியாசமான கதைக்களத்துடன், அனைத்து தரப்பு ரசிகர்களும் ரசிக்கும் வகையில் படத்தை உருவாக்கியுள்ளதாக படக்குழு தெரிவித்துள்ளது.
இப்படத்தில் ஹரிஷ் மற்றும் தனலட்சுமியுடன் மொட்டை ராஜேந்திரன், கல்கி ராஜா, ரமா, பிரியதர்ஷினி உள்ளிட்ட பலர் முக்கிய கதாபாத்திரங்களில் நடித்துள்ளனர்.
‘நல்லபடம்’ படத்திற்கு இனியன் J ஹாரிஸ் ஒளிப்பதிவு செய்துள்ளார். B.R. பிரகாஷ் படத்தொகுப்பு பணிகளை மேற்கொண்டுள்ளார். சகிஷ்ணா சேவியர் இசையமைத்துள்ள நிலையில், பாடல்களுக்கு அஸ்மின் வரிகள் எழுதியுள்ளார்.
ஹரிஷ் சினிமாஸ் சார்பில் A. அழகுபாண்டியன் தயாரித்துள்ள இப்படத்தை ஹரிஷ் சினிமாஸ் நிறுவனமே தயாரித்து, விநியோகித்து வெளியிடுகிறது.
சமூகப் பிரச்சினையை நகைச்சுவை மற்றும் பொழுதுபோக்கு வழியாக அணுகும் ‘நல்லபடம்’, வரும் செப்டம்பர் 18-ம் தேதி உலகம் முழுவதும் திரையரங்குகளில் வெளியாக உள்ளது.
