ஒரு திரைப்படத்தின் வெற்றியை அதன் திரையரங்கு வசூல் அல்லது திரையிடப்பட்ட நாட்களின் எண்ணிக்கையால் மட்டுமே கணக்கிட முடியாது என்பதை ‘ஜி.டி.என்.’ திரைப்படம் மீண்டும் நிரூபித்துள்ளது. பழம்பெரும் இந்திய கண்டுபிடிப்பாளரும் தொழில்முனைவோருமான ஜி.டி. நாயுடுவின் வாழ்க்கை மற்றும் சாதனைகளை மையமாகக் கொண்டு உருவான இப்படம், திரையரங்குகளைத் தொடர்ந்து தற்போது ஓடிடி தளத்திலும் ரசிகர்களின் கவனத்தை ஈர்த்து வருகிறது.
ஆர். மாதவன் ஜி.டி. நாயுடுவாக நடித்துள்ள இப்படத்தில் சத்யராஜ், ஜெயராம், பிரியாமணி, துஷாரா விஜயன் உள்ளிட்ட பல முன்னணி நட்சத்திரங்கள் முக்கிய கதாபாத்திரங்களில் நடித்துள்ளனர். கடந்த ஆகஸ்ட் 7ஆம் தேதி திரையரங்குகளில் வெளியான இப்படம், விமர்சகர்களின் பாராட்டுகளையும் ரசிகர்களின் வரவேற்பையும் பெற்று நான்கு வாரங்கள் வெற்றிகரமாக திரையரங்குகளில் ஓடியது.
குறிப்பாக, ‘இந்தியாவின் எடிசன்’ என்று அழைக்கப்படும் ஜி.டி. நாயுடுவின் வாழ்க்கையை திரையில் பிரதிபலித்த விதமும், அந்த கதாபாத்திரத்தில் மாதவனின் நடிப்பும் ரசிகர்களிடையே பெரும் பாராட்டைப் பெற்றது. காலனித்துவ ஆட்சிக் காலத்தில் பல்வேறு தடைகளை எதிர்கொண்டு, இந்தியாவில் சொந்தமாக தொழில்நுட்பங்களை உருவாக்க வேண்டும் என்ற கனவுடன் ஜி.டி. நாயுடு மேற்கொண்ட முயற்சிகளையும், அவரது வாழ்க்கைப் பயணத்தையும் விரிவான பின்னணியுடன் இப்படம் பதிவு செய்துள்ளது.
திரையரங்குகளில் வெற்றிகரமாக ஓடிய இப்படத்தின் அடுத்த பயணம் செப்டம்பர் 4ஆம் தேதி நெட்ஃபிளிக்ஸ் வெளியீட்டின் மூலம் தொடங்கியது. பல்வேறு மொழிகளில் வெளியாகிய ‘ஜி.டி.என்.’, ஓடிடியில் வெளியான சில நாட்களிலேயே ரசிகர்களிடையே வேகமாக பேசப்படும் படமாக மாறியது.
திரையரங்குகளில் படத்தை ரசித்த ரசிகர்களின் பரிந்துரைகள் ஓடிடி வெளியீட்டிற்குப் பிறகும் தொடர்ந்து அதிகரிக்க, இந்திய அளவில் நெட்ஃபிளிக்ஸில் அதிகம் டிரெண்டாகும் திரைப்படங்களின் பட்டியலில் ‘ஜி.டி.என்.’ டாப் 2 இடங்களுக்குள் முன்னேறியது. இதன் மூலம் நெட்ஃபிளிக்ஸ் பார்வையாளர்களிடையே அதிகம் விவாதிக்கப்படும் இந்திய திரைப்படங்களில் ஒன்றாகவும் இப்படம் உருவெடுத்துள்ளது.
இந்தியாவைத் தாண்டியும் இப்படத்திற்கான வரவேற்பு தொடர்ந்து அதிகரித்து வருகிறது. நெட்ஃபிளிக்ஸின் உலகளாவிய டாப் 10 திரைப்படங்கள் பட்டியலிலும் ‘ஜி.டி.என்.’ இடம்பெற்றுள்ளது. குறிப்பாக வெளிநாடுகளில் வசிக்கும் இந்தியர்கள் மட்டுமின்றி, பல்வேறு நாடுகளைச் சேர்ந்த திரைப்பட ரசிகர்களின் கவனத்தையும் இப்படம் பெற்றுள்ளது.
ஐக்கிய அரபு அமீரகம், இலங்கை, சிங்கப்பூர், பாகிஸ்தான், பஹ்ரைன் உள்ளிட்ட பல்வேறு நாடுகளில் நெட்ஃபிளிக்ஸ் டாப் 5 திரைப்படங்களின் பட்டியலிலும் ‘ஜி.டி.என்.’ இடம்பிடித்துள்ளது.
வாழ்க்கை வரலாற்றை அடிப்படையாகக் கொண்ட திரைப்படங்களும், வலுவான கதையம்சம் கொண்ட இந்தியப் படங்களும் ஓடிடி தளங்களின் வாயிலாக சர்வதேச பார்வையாளர்களை சென்றடைய முடியும் என்பதற்கு ‘ஜி.டி.என்.’ திரைப்படத்தின் தற்போதைய வரவேற்பு முக்கியமான உதாரணமாக அமைந்துள்ளது.
திரையரங்குகளில் கிடைத்த விமர்சன ரீதியான வரவேற்பு படத்திற்கு நல்ல அடித்தளத்தை ஏற்படுத்திய நிலையில், ஓடிடி வெளியீட்டிற்குப் பிறகு கிடைத்துள்ள உலகளாவிய கவனம் ‘ஜி.டி.என்.’ திரைப்படத்தின் வெற்றியை அடுத்த கட்டத்திற்கு கொண்டு சென்றுள்ளது. நல்ல கதைகளுக்கு ஓடிடி தளங்கள் இரண்டாவது வாய்ப்பை வழங்குவதோடு மட்டுமல்லாமல், அவற்றை உலக அளவில் கொண்டு சேர்க்கும் மிகப்பெரிய தளமாகவும் மாறி வருகின்றன என்பதற்கு இப்படம் மற்றுமொரு சான்றாகியுள்ளது.
