“ஏழு கடல் ஏழு மலை” ராம் இயக்கத்தில் சுரேஷ் காமாட்சி – வி ஹவுஸ் புரொடக்ஷன்ஸ் தயாரிப்பில் உருவாகியிருக்கும் இந்த படத்திற்கு இசை யுவன் சங்கர் ராஜா. இந்த படத்தில் நிவின் பாலி, அஞ்சலி, சூரி மற்றும் பலர் நடித்துள்ளனர்.
மரணத்தை வென்ற மனிதனாக வாழும் நிவின் பாலி, ஆயிரக்கணக்கான ஆண்டுகளை கடந்து வாழ்ந்தாலும், தனது காதலியை தேடும் முயற்சியை மட்டும் ஒருபோதும் கைவிடுவதில்லை. பல்வேறு காலங்களையும் கடந்து தொடரும் அந்தப் பயணத்தில், எதிர்பாராத விதமாக சூரியை சந்திக்கிறார். இந்த சந்திப்பை மையமாக வைத்து காதலின் ஆழம், உயிர்களின் சமத்துவம் மற்றும் இயற்கையோடு மனிதனுக்குள்ள தொடர்பு ஆகியவற்றை தனக்கே உரிய காட்சி மொழியில் சொல்லியிருப்பதே ‘ஏழு கடல் ஏழு மலை’.
மரணமில்லாத மனிதராக நீண்ட தலைமுடியுடன் தோன்றும் நிவின் பாலி, காலங்கள் மாறினாலும் மாறாத ஒரு கதாபாத்திரமாக படம் முழுவதும் பயணிக்கிறார். நீண்ட ஆயுளில் அவர் சந்தித்த அனுபவங்கள், காதல், பிரிவு மற்றும் ஏக்கத்தை தனது பார்வை மற்றும் உடல் மொழி மூலம் சிறப்பாக வெளிப்படுத்துகிறார். தொடக்கத்தில் தனது சொந்த குரலில் வசனம் பேசியிருக்கும் அவர், முக்கியமான சில பகுதிகளில் இயக்குநர் ராமின் குரலில் பேசுவது கதாபாத்திரத்தின் தன்மைக்கு வித்தியாசமான பரிமாணத்தை கொடுக்கிறது.
நிவின் பாலியின் கட்டுப்பாட்டில் சிக்கிக்கொள்ளும் சாதாரண மனிதராக சூரி நடித்திருக்கிறார். குடும்பம், வாழ்க்கை மற்றும் தனது பாதுகாப்பு என அன்றாட தேவைகளுக்குள் வாழும் சராசரி மனிதனின் பிரதிநிதியாக அவரது கதாபாத்திரம் அமைந்துள்ளது. குறிப்பாக எதிர்பாராத சூழ்நிலையில் சிக்கும்போது வெளிப்படும் பயம், பதற்றம் மற்றும் குழப்பத்தை இயல்பான நடிப்பின் மூலம் சிறப்பாக பதிவு செய்திருக்கிறார். நிவின் பாலியுடன் அவர் பகிர்ந்து கொள்ளும் காட்சிகள் படத்தின் முக்கியமான அம்சங்களில் ஒன்றாக அமைகின்றன.
அஞ்சலி நாயகியாக சில காட்சிகளில் மட்டுமே தோன்றினாலும், கதையின் உணர்வில் முக்கியமான இடத்தை பிடிக்கிறார். அவரது தோற்றமும், நடிப்பும் குறைவான நேரத்திலேயே பார்வையாளர்களின் கவனத்தை ஈர்க்கிறது.
என்.கே. ஏகாம்பரத்தின் ஒளிப்பதிவு படத்தின் மிகப்பெரிய பலங்களில் ஒன்று. ரயில் பயணத்தை வெறும் பயணமாக காட்டாமல், அதன் வழியாக இயக்குநர் உருவாக்கியிருக்கும் உலகத்தையும், இயற்கையின் அழகையும் காட்சிகளாக மாற்றியிருக்கிறார். ரயில், நிலப்பரப்பு, இயற்கை மற்றும் கதாபாத்திரங்களின் பயணம் என அனைத்தையும் இணைத்து தனித்துவமான காட்சி அனுபவத்தை உருவாக்கியிருக்கிறார்.
யுவன் சங்கர் ராஜாவின் இசை படத்தின் உணர்வுகளோடு நெருக்கமாக பயணிக்கிறது. பாடல்கள் அனைத்தும் கேட்கும் ரகத்தில் அமைந்துள்ளன. குறிப்பாக “ஏழு ஏழு கடல் தாண்டி” பாடல் மீண்டும் மீண்டும் கேட்கத் தூண்டும் வகையில் அமைந்துள்ளது. பின்னணி இசை பல இடங்களில் காட்சிகளின் தாக்கத்தையும், கதாபாத்திரங்களின் உணர்வுகளையும் அதிகரிக்கிறது.
இயக்குநர் ராமின் கற்பனை உலகத்தை காட்சி மொழியாக மாற்றுவதில் படத்தொகுப்பாளர் மதி.வி.எஸ். முக்கிய பங்காற்றியிருக்கிறார். வழக்கமான கதை சொல்லும் முறையை பின்பற்றாமல், காட்சிகளின் வழியாகவே கதையின் உணர்வுகளை பார்வையாளர்களிடம் கொண்டு செல்லும் முயற்சி படத்தொகுப்பிலும் பிரதிபலிக்கிறது.
இயக்குநர் ராம், தனது தனித்துவமான சிந்தனையையும் உலகப் பார்வையையும் ‘ஏழு கடல் ஏழு மலை’ மூலம் திரையில் பதிவு செய்திருக்கிறார். வழக்கமான சினிமா அனுபவத்தை எதிர்பார்க்கும் ரசிகர்களுக்கு சில பகுதிகள் புரிந்துகொள்ள முடியாத புதிராக தோன்றலாம். ஆனால், படத்தின் மைய உணர்வை புரிந்துகொள்ள முயற்சித்தால், இயக்குநர் சொல்ல வரும் கருத்து மிகவும் எளிமையானது — பேரன்பு.
காதல் என்பது மனிதர்களுக்கு மட்டும் சொந்தமானது அல்ல; இந்த உலகில் இருக்கும் ஒவ்வொரு உயிருக்கும் அதன் சொந்தமான அன்பும் உணர்வும் இருக்கிறது என்ற கருத்தை படம் அழுத்தமாக முன்வைக்கிறது. காதல் கிடைக்காமல் போகலாம், பிரிவு ஏற்படலாம், வாழ்க்கை பல தடைகளை உருவாக்கலாம். இருந்தாலும், உண்மையான காதலை தேடும் பயணம் முடிவில்லாதது என்பதை ஒரு கனவுலகப் பயணமாக ராம் சொல்லியிருக்கிறார்.
இது வழக்கமான கதை, வழக்கமான திரைக்கதை கொண்ட படம் அல்ல. இயக்குநரின் கற்பனையையும், காதல் மீதான அவரது பார்வையையும் புரிந்துகொண்டு பயணிக்கும் ரசிகர்களுக்கு இது வித்தியாசமான சினிமா அனுபவமாக அமையும். இயற்கை, காதல், மனித உணர்வுகள் என அனைத்தையும் கடந்து செல்லும் இந்தப் பயணம், ‘ஏழு கடல் ஏழு மலை’யை ஒரு தனித்துவமான படைப்பாக மாற்றுகிறது.
