98-வது ஆஸ்கார் விருதுகளுக்கான பரிசீலனைத் தகுதிப் பட்டியலில் (Oscar Consideration Ballot) இடம்பிடித்து சர்வதேச அளவில் கவனம் பெற்றுள்ள ‘கெவி’ திரைப்படம், தற்போது ஒரு முக்கியமான சமூக மாற்றத்தின் மூலம் மீண்டும் செய்திகளில் இடம்பிடித்துள்ளது. கொடைக்கானல் அருகே அமைந்துள்ள வெள்ளகெவி மலைக் கிராமத்தின் நீண்டகாலப் போராட்டத்தையும், அங்கு நிகழ்ந்துள்ள வரலாற்றுச் சிறப்புமிக்க மாற்றத்தையும் எடுத்துரைக்கும் ‘மலை கீதம்’ பாடல், மக்களின் வெற்றியைப் பெருமையுடன் கொண்டாடுகிறது.
ஆர்டப் ட்ரையாங்கிள்ஸ் ஃபிலிம் கம்பெனி (Artuptriangles Film Kampany) தயாரிப்பில், தமிழ் தயாளன் இயக்கத்தில் உருவான ‘கெவி’ திரைப்படத்தின் முக்கியமான பாடலாக ‘மலை கீதம்’ அமைந்துள்ளது. இப்பாடலுக்கு ‘தேனிசைத் தென்றல்’ தேவா தனது தனித்துவமான குரலில் பாடியுள்ளார். கவிப்பேரரசு வைரமுத்து பாடல் வரிகளை எழுதியுள்ளார்.
வெள்ளகெவி கிராமத்தின் சுமார் 400 ஆண்டுகால வரலாற்றில் முதன்முறையாக அரசு ரேஷன் கடை அமைக்கப்பட்டிருப்பது, அப்பகுதி மக்களின் வாழ்க்கையில் குறிப்பிடத்தக்க மாற்றமாகப் பார்க்கப்படுகிறது. அடிப்படை வசதிகளுக்காக நீண்டகாலமாகப் போராடி வரும் மலைவாழ் மக்களின் எதிர்பார்ப்புகள், சவால்கள் மற்றும் அவர்களுக்குக் கிடைத்துள்ள இந்த வெற்றி ஆகியவற்றைப் பாடல் உணர்வுப்பூர்வமாக வெளிப்படுத்துகிறது.
கிராமத்திற்குச் சாலை வசதி ஏற்படுத்தித் தர வேண்டும் என்ற கோரிக்கை இன்னும் நிறைவேறாத நிலையில், அரசு ரேஷன் கடை அமைந்துள்ளதை ஒரு முக்கியமான முன்னேற்றமாகப் படக்குழுவினர் கருதுகின்றனர். உள்ளூர் மக்களின் அடிப்படைத் தேவைகள் குறித்த விழிப்புணர்வை ஏற்படுத்துவதோடு, அவர்களின் வாழ்வியல் போராட்டத்தை உலக அளவில் எடுத்துச் செல்லும் முயற்சியாகவும் இந்தப் பாடல் அமைந்துள்ளது.
இதுகுறித்து திரைப்படத்தின் இயக்குநர் தமிழ் தயாளன் நெகிழ்ச்சியுடன் பகிர்ந்துள்ள அறிக்கை:
“எங்கள் நெஞ்சம் நன்றியால் நிறைந்திருக்கிறது. வெள்ளகெவி கிராம மக்களுக்கு ஒரு முறையான சாலை வசதியை ஏற்படுத்தித் தர வேண்டும் என்பதுதான் எங்களது உண்மையான, நீண்ட காலப் போராட்டமாக இருந்தது. அந்த உள்கட்டமைப்பு வசதிக்காக நாங்கள் இன்னமும் காத்துக் கொண்டிருக்கும் வேளையிலும், இந்த 400 ஆண்டுக்கால வரலாற்றில் முதல்முறையாக எங்கள் கிராமத்திற்கு ஒரு அரசு ரேஷன் கடையைக் கொண்டுவர முடிந்திருக்கிறது என்பதை ஒரு மைல்கல்லாகப் பார்த்து நாங்கள் பெருமகிழ்ச்சி அடைகிறோம். நாங்கள் சாலையை எதிர்பார்த்தோம், ஆனால் எங்களால் குறைந்தபட்சம் ஒரு ரேஷன் கடையையாவது எங்கள் மக்களுக்குக் கொண்டுவர முடிந்தது. இது நிச்சயமாகக் கொண்டாடப்பட வேண்டிய ஒரு வெற்றி! இந்த எளிய மலைவாழ் மக்களின் வாழ்வாதாரப் போராட்டம் இன்று ஆஸ்கார் தகுதிப் பட்டியல் மூலம் உலக மேடை வரை சென்றிருப்பதும், தேவா சார் மற்றும் வைரமுத்து சார் போன்ற மாபெரும் ஆளுமைகள் எங்கள் மக்களின் வலியையும் வெற்றியையும் தங்களது குரலாலும் வரிகளாலும் எதிரொலித்திருப்பதும், ஒரு படைப்பாளியாக எனக்குக் கிடைத்த பெருமைமிகு தருணம்.”
