“கருப்பு” ஆர்.ஜே.பாலாஜி இயக்கத்தில் ட்ரீம் வாரியர் பிக்சர்ஸ் – எஸ்.ஆர்.பிரகாஷ் பாபு, எஸ்.ஆர்.பிரபு தயாரிப்பில் உருவாகியிருக்கும் இந்த படத்திற்கு இசை சாய் அபயங்கர். இந்த படத்தில் சூர்யா, திரிஷா, ஆர்.ஜே.பாலாஜி, நட்டி, சுவாஸ்திகா, சிவதா, இந்திரன்ஸ் மற்றும் பலர் நடித்துள்ளனர்.
பிரபல வழக்கறிஞராக இருக்கும் ஆர்.ஜே.பாலாஜி, லஞ்சம் மற்றும் அதிகாரத்தின் மூலம் நீதிமன்றத்தை தனது கட்டுப்பாட்டில் வைத்திருக்கிறார். கட்டப்பஞ்சாயத்து முதல் பல சட்டவிரோத செயல்கள் வரை அனைத்தையும் தனது ஆதிக்கத்தில் நடத்தும் அவர், “தன்னை மீறி நீதிமன்றத்தில் எதுவும் நடக்காது” என்ற நிலையை உருவாக்கியிருக்கிறார். இதனால் நீதிக்காக போராடும் சாமானிய மக்களின் வேதனை தொடர்கிறது. அவர்களின் அழுகுரலைக் கேட்டு, அந்த நீதிமன்றத்தில் இருக்கும் கருப்புசாமி சூர்யா நேரில் வந்து ஆர்.ஜே.பாலாஜியை எதிர்கொள்கிறார்.
வந்திருப்பது கடவுள் என்பதை அறிந்திருந்தாலும், “இந்த அமைப்பை யாராலும் மாற்ற முடியாது. முடிந்தால் கடவுளாக அல்லாமல் ஒரு சாதாரண மனிதராக இருந்து மாற்றிக் காட்டுங்கள்” என்று ஆர்.ஜே.பாலாஜி சவால் விடுகிறார். அந்த சவாலை ஏற்றுக்கொள்ளும் கருப்புசாமி, சராசரி மனிதராக மாறி நீதித்துறையில் நிலவும் ஊழல் மற்றும் அநீதிகளுக்கு எதிராக போராடுகிறார். இறுதியில் அவர் அந்த அமைப்பை மாற்ற முடிந்ததா இல்லையா என்பது தான் படத்தின் மீதிக்கதை.
படத்தில் சூர்யாவா நாயகன் அல்லது ஆர்.ஜே.பாலாஜியா என்ற கேள்வி எழும் அளவுக்கு இருவருக்கும் சமமான முக்கியத்துவம் கொடுக்கப்பட்டுள்ளது. ‘ஜெய்பீம்’ படத்தில் நேர்மையான வழக்கறிஞராக நடித்த சூர்யா, இதில் அநீதிகளை எதிர்த்து சீறும் கருப்புசாமியாக ஆக்ரோஷமான நடிப்பை வெளிப்படுத்தியிருக்கிறார். அதேசமயம், மனிதனாக வரும் காட்சிகளில் உணர்ச்சிபூர்வமான நடிப்பாலும் கவனம் ஈர்க்கிறார்.
பேபி கண்ணன் என்ற கதாபாத்திரத்தில் நடித்துள்ள ஆர்.ஜே.பாலாஜி, மாஸ் வில்லன் தோற்றத்துடன் மிரட்டலான நடிப்பை வெளிப்படுத்தியிருக்கிறார். அவரது உடல் மொழி, வசன உச்சரிப்பு மற்றும் கம்பீரமான திரைநடை கதாபாத்திரத்திற்கு பலம் சேர்க்கிறது.
திரிஷா, வழக்கறிஞராக சில காட்சிகளில் தோன்றினாலும், கதையோடு முழுமையாக ஒன்றிப் போகவில்லை. பாடல், நீதிமன்ற காட்சி, உணர்ச்சி தருணங்கள் என பல இடங்களில் வந்தாலும், அவரது கதாபாத்திரம் ஆழமில்லாமல் அமைந்துள்ளது.
நட்டி, இந்திரன்ஸ், சுவாசிகா, சிவதா உள்ளிட்ட துணை நடிகர்கள் தங்களது அனுபவமான நடிப்பால் கதைக்கு வலு சேர்த்திருக்கிறார்கள்.
ஒளிப்பதிவாளர் ஜி.கே.விஷ்ணு, படத்தை பிரமாண்டமாக காட்சிப்படுத்தியிருக்கிறார். ஆனால் பல இடங்களில் அதிகப்படியான ஒளி மற்றும் சிவப்பு நிற டோன்கள் கண்களுக்கு சோர்வை ஏற்படுத்துகிறது. சண்டைக் காட்சிகளில் அதிகப்படியான கிராபிக்ஸ் பயன்படுத்தப்பட்டிருப்பதும் இயல்பை குறைக்கிறது.
சாய் அபயங்கரின் இசையில் பாடல்கள் இன்ஸ்டா ரீல்ஸ் பாணியில் அமைந்துள்ளன. பாடல் வரிகள் தெளிவாக கேட்காத அளவுக்கு இசைக்கு அதிக முக்கியத்துவம் கொடுக்கப்பட்டுள்ளது. பின்னணி இசையும் பல இடங்களில் அதிக சத்தமாக இருந்து காட்சிகளின் தாக்கத்தை குறைக்கிறது.
படத்தொகுப்பாளர் கலைவாணன், நீளமான கதையை சுவாரஸ்யமாக நகர்த்த முயற்சித்திருக்கிறார். இருந்தாலும் சில காட்சிகள் தேவைக்கு அதிகமாக நீள்கின்றன.
எழுதி இயக்கியுள்ள ஆர்.ஜே.பாலாஜி, நீதித்துறையில் நடக்கும் ஊழல், விலைபோகும் நீதியரசர்கள், பொதுமக்கள் எதிர்கொள்ளும் அநீதிகள் போன்ற பல முக்கியமான விஷயங்களை தைரியமாக பேச முயற்சித்திருக்கிறார். ஆனால் அதை கடவுள் பின்னணியுடன் சொல்லாமல், ஒரு சாதாரண மனிதனின் போராட்டமாக சொல்லியிருந்தால் படம் இன்னும் அதிக தாக்கத்தை ஏற்படுத்தியிருக்கும்.
“கருப்பு” படத்திற்கு மதிப்பீடு 3/5
