திண்டுக்கல் லியோனியின் மகன் லியோ சிவக்குமார் கதாநாயகனாக நடித்துள்ள ‘டெலிவரி பாய்’ திரைப்படத்தின் டிரைலரை நடிகர் சிலம்பரசன் டிஆர் இன்று வெளியிட்டார். Asasi Creations சார்பில் அமுதா லியோனி தயாரித்துள்ள இப்படத்தை நானி எழுதி இயக்கியுள்ளார். வரும் அக்டோபர் 23-ம் தேதி திரையரங்குகளில் வெளியாகவுள்ள இப்படத்தின் டிரைலர், படத்தின் கதைக்களம் குறித்த ஆர்வத்தை ரசிகர்களிடையே ஏற்படுத்தியுள்ளது.
அம்மா – மகன் இடையிலான பாசத்தை வெளிப்படுத்தும் உணர்வுபூர்வமான காட்சிகளுடன் தொடங்கும் டிரைலர், பின்னர் எதிர்பாராத சம்பவங்களின் வழியாக விறுவிறுப்பாக நகர்கிறது. சிறு வயது முதலே ஒன்றாக வளர்ந்து குற்றச் செயல்களில் ஈடுபடும் ஏழு பேரின் வாழ்க்கைப் பின்னணியும், அவர்களுடன் எதிர்பாராத விதமாகத் தொடர்புகொள்ளும் கதாநாயகன் சந்திக்கும் சிக்கல்களும் கதையின் முக்கிய அம்சங்களாக இடம்பெற்றுள்ளன.
ஒரு சாதாரண டெலிவரி பாயின் வாழ்க்கையில் ஏற்படும் சம்பவங்கள் அவனது எதிர்காலத்தையே எவ்வாறு மாற்றுகின்றன என்பதைப் புரிந்துகொள்ளும் ஆவலை டிரைலர் தூண்டுகிறது. குடும்ப உறவுகள் மற்றும் உணர்வுகளுக்கு முக்கியத்துவம் அளிக்கும் அதே நேரத்தில், குற்றச் சம்பவங்கள், அதிரடி காட்சிகள் எனப் பல திருப்பங்களையும் உள்ளடக்கியதாக இப்படம் உருவாகியிருப்பது டிரைலர் மூலம் தெரிய வருகிறது.
குடும்பப் பாசம், காதல், ஆக்ஷன், நகைச்சுவை எனப் பல்வேறு அம்சங்கள் ஒன்றிணைந்த முழுமையான கமர்ஷியல் திரைப்படமாக ‘டெலிவரி பாய்’ உருவாகியுள்ளது. உணர்ச்சிகரமான தருணங்களுக்கு இடையே இடம்பெறும் நகைச்சுவை மற்றும் அதிரடி காட்சிகள் படத்தின் மீதான எதிர்பார்ப்பை அதிகரிக்கின்றன.
இப்படத்தில் லியோ சிவக்குமாருக்கு ஜோடியாக பிரிகிடா சாகா நடித்துள்ளார். ராதிகா சரத்குமார், கதாநாயகனின் தாயாக முக்கியமான கதாபாத்திரத்தில் நடித்துள்ளார். இவர்களுடன் காளி வெங்கட், போஸ் வெங்கட், ஜென்சன் திவாகர், துஷ்யந்த், உதயா தீப் உள்ளிட்ட பலரும் நடித்துள்ளனர்.
Chaandi Talkies சார்பில் லெனின் மாதேஸ்வரன் தயாரிப்பில் உருவாகியுள்ள இப்படத்திற்கு சுந்தரமூர்த்தி கே.எஸ். இசையமைத்துள்ளார். அசோக்குமார் ராஜ் மற்றும் பிரசன்னா எஸ். குமார் ஒளிப்பதிவுப் பணிகளை மேற்கொண்டுள்ளனர். ஆர். வசந்தகுமார் படத்தொகுப்பையும், பி. ஜெய் முருகன் கலை இயக்கத்தையும் கவனித்துள்ளனர். இப்படத்தின் சண்டைக் காட்சிகளுக்கு ஃபீனிக்ஸ் பிரபு சண்டைப் பயிற்சி அளித்துள்ளார். இயக்குநர் நானி இப்படத்தின் மூலம் இயக்குநராக அறிமுகமாகிறார்.
சிலம்பரசன் டிஆர் வெளியிட்டுள்ள ‘டெலிவரி பாய்’ டிரைலர், குடும்ப உணர்வுகள், காதல், நகைச்சுவை மற்றும் அதிரடி எனப் பல அம்சங்களைக் கொண்ட திரைப்படத்திற்கான எதிர்பார்ப்பை உருவாக்கியுள்ளது. ரசிகர்களின் கவனத்தை ஈர்த்துள்ள இப்படம் வரும் அக்டோபர் 23-ம் தேதி திரையரங்குகளில் வெளியாகிறது.
