ஸ்டோன் பெஞ்ச் ஸ்டுடியோ மற்றும் மிஸ்ரிலால் பிக்சர்ஸ் நிறுவனங்கள் இணைந்து தயாரிக்கும் புதிய திரைப்படம் ‘ஹைட் & சில்க்’ (Hide & Silk). சுஹாஸ் கதாநாயகனாக நடிக்கும் இப்படத்தின் டைட்டில் புரோமோ வெளியாகி ரசிகர்களின் கவனத்தை ஈர்த்துள்ளது. தெலுங்கு ரசிகர்களுக்காக நடிகர் வருண் தேஜும், தமிழ் ரசிகர்களுக்காக நடிகர் சூரியும் புரோமோவை வெளியிட்டுள்ளனர். மாறுபட்ட கதைக்களத்துடன் உருவாகும் இப்படம் குறித்த எதிர்பார்ப்பையும் இந்த அறிமுக வீடியோ அதிகரித்துள்ளது.
ஸ்டோன் பெஞ்ச் ஸ்டுடியோ நிறுவனத்தின் தயாரிப்பாளர் கார்த்திகேயன் சந்தானம், தமிழ் மற்றும் மலையாள மொழிகளில் இதுவரை 18 திரைப்படங்களைத் தயாரித்துள்ளார். அடுத்தகட்டமாகத் தெலுங்குத் திரையுலகிலும் தனது தயாரிப்புப் பயணத்தை விரிவுபடுத்தத் திட்டமிட்டுள்ள அவர், நான்கு திரைப்படங்களைத் தயாரிக்க உள்ளார். இந்த வரிசையில் உருவாகும் முதல் படம்தான் ‘ஹைட் & சில்க்’. தமிழ் மற்றும் தெலுங்கு ஆகிய இரு மொழிகளிலும் இப்படம் வெளியாகவுள்ளது. இந்தத் தயாரிப்பில் வர்திகா ஜெயினின் மிஸ்ரிலால் பிக்சர்ஸ் நிறுவனமும் ஸ்டோன் பெஞ்ச் ஸ்டுடியோவுடன் இணைந்துள்ளது.
‘மண்டாடி’ படத்தைத் தொடர்ந்து சுஹாஸ் இப்படத்தில் கதாநாயகனாக நடிக்கிறார். ‘லப்பர் பந்து’, ‘DC’ ஆகிய படங்களில் நடித்த சஞ்சனா கதாநாயகியாக நடிக்கிறார். இவர்களுடன் மூத்த நடிகர் தனிகெல்லா பரணி, நந்து, கருணாகரன் உள்ளிட்டோர் முக்கிய கதாபாத்திரங்களில் இடம்பெற்றுள்ளனர்.
பிரபல இயக்குநர் கார்த்திக் சுப்புராஜிடம் உதவி இயக்குநராகப் பணியாற்றிய ராஜேந்திர பாலா, இப்படத்தின் கதை, திரைக்கதை எழுதி இயக்கியுள்ளார். இதன் மூலம் அவர் இயக்குநராகத் தனது முதல் படத்தை இயக்கியுள்ளார்.
வெளியாகியுள்ள டைட்டில் புரோமோ, படத்தின் கதைக்களத்தை நேரடியாக வெளிப்படுத்தாமல், அதற்கான தனித்துவமான உலகத்தை அறிமுகப்படுத்துகிறது. பட்டுப் புடவைகளை நெய்யும் நெசவாளரின் வாழ்க்கையும், நவீன காலத்தைச் சேர்ந்த ஒரு பெண்ணின் வாழ்க்கையும் எதிர்பாராத விதமாகச் சந்திப்பதைப் புரோமோ காட்சிப்படுத்துகிறது.
ஒவ்வொரு பட்டுப் புடவைக்கும் அதை அணிய வேண்டிய ஒரு பெண் இருப்பதாகவும், அதன் உண்மையான அழகு நெசவு செய்யப்படும் தருணத்துடன் முடிந்துவிடுவதில்லை என்றும் நெசவாளரின் குரல் கவித்துவமாக எடுத்துரைக்கிறது. மேலும், நெசவாளர் ஒரு புடவையை உருவாக்கும் பயணத்திலேயே, அந்தப் புடவை தனக்கான பெண்ணைத் தேர்ந்தெடுத்துக் கொள்கிறது என்ற சுவாரசியமான கருத்தும் இடம்பெற்றுள்ளது. முற்றிலும் வேறுபட்ட பின்னணிகளைக் கொண்ட இரு உலகங்கள் ஒன்றிணையும் இந்தக் காட்சிகள், படத்தின் மீதான ஆர்வத்தைத் தூண்டுகின்றன.
தொழில்நுட்பக் குழுவில் கார்த்திக் பழனி ஒளிப்பதிவாளராகவும், ஷஃபீக் முகமது அலி படத்தொகுப்பாளராகவும் பணியாற்றுகின்றனர். ‘3 BHK’ படத்தின் மூலம் கவனம் பெற்ற அம்ரித் ராம்நாத் இசையமைக்கிறார்.
‘அனிமல்’, ‘பேட்ட’ உள்ளிட்ட படங்களில் பணியாற்றிய சுரேஷ் செல்வராஜன் தயாரிப்பு வடிவமைப்புப் பொறுப்பை ஏற்றுள்ளார். ஜஷுவா சண்டைக்காட்சிகளையும், பிரவீன் ராஜா ஆடை வடிவமைப்பையும் கவனிக்கின்றனர். ஷெரீப் நடன இயக்குநராகவும், மோகன் ராஜன் பாடலாசிரியராகவும் பணியாற்றுகின்றனர். ஒலி வடிவமைப்புப் பணிகளை சுரேன் ஜி மற்றும் அழகிய கூத்தன் மேற்கொள்கின்றனர். ஒலி கலவைப் பணியை சுரேன் ஜி கவனிக்க, அமோல் போடகே கலை இயக்குநராகப் பணியாற்றுகிறார்.
கார்த்திகேயன் சந்தானம் மற்றும் வர்திகா ஜெயின் இணைந்து தயாரிக்கும் ‘ஹைட் & சில்க்’ திரைப்படம் விரைவில் வெளியாகவுள்ளது. படத்தின் வெளியீட்டுத் தேதி உள்ளிட்ட கூடுதல் தகவல்கள் அடுத்தடுத்த அறிவிப்புகளாக வெளியாகும் என எதிர்பார்க்கப்படுகிறது.
